Сёлета ў Віцебску пачнецца будаўніцтва дзіцячага садка ў Білева-2 і рэканструкцыя будынка ў Рубе пад паліклініку і бальніцу

Інвестыцыйная праграма Віцебска на 2014 год зацверджана ў аб'ёме амаль 146,1 млрд рублёў (або 6,5% выдаткаў гарадскога бюджэту) і ўключае 58 аб'ектаў. У параўнанні з 2013-м памер капітальных укладанняў вырас больш чым на траціну (у даляравым эквіваленце), а пералік праектаў пашырыўся прыкладна на чвэрць. Разам з тым, горад мае намер сканцэнтраваць рэсурсы на аб'ектах, што ўжо будуюцца, і па магчымасці ўстрымацца ад новабудоўляў.

Па словах старшыні гарвыканкама Віктара Нікалайкіна, такі падыход дамінаваў пры фарміраванні інвестпраграмы на чарговы бюджэтны год. Сярод новых аб'ектаў, праца на якіх пачнецца ў бягучым годзе, кіраўнік горада вылучыў толькі будаўніцтва дзіцячай дашкольнай установы ў мікрараёне Білева-2, а таксама рэканструкцыю будынка ў Рубе пад размяшчэнне паліклінікі і бальніцы. Асноўныя прыярытэты інвестпраграмы засталіся без змяненняў, а іх удзельная вага ў агульным аб'ёме фінансавання прайшла карэкціроўку.

Традыцыйна найбольшая інвестыцыйная падтрымка з гарадской праграмы прыпадае на жыллёва-камунальныя паслугі і жыллёвае будаўніцтва. У бягучым годзе на гэтыя мэты прадугледжваецца амаль 97 млрд рублёў, або 66,3% бюджэтных інвестыцый у асноўны капітал, а гэта амаль на 8 працэнтных пунктаў больш, чым у 2013-м. У абласным цэнтры, у прыватнасці, працягнецца рэканструкцыя Маскоўскага праспекта і вуліцы Церашковай, пешаходных вуліц Суворава і Гогаля, аб'ектаў камунальнага прадпрыемства «Віцебскгарадплодагандлю», добраўпарадкаванне паркавых і дваравых тэрыторый, фінансаванне ўзвядзення падземнага пераходу ў раёне Летняга амфітэатра. Застаецца актуальнай для горада і тэма перасялення грамадзян са сталага жылля.

Другім па аб'ёме фінансавання прыярытэтам з'яўляецца сфера культуры, на якую будзе накіравана каля 18,4 млрд рублёў. Удзельная вага выдаткаў на гэту галіну складзе 12,6%, што крыху менш, чым у мінулым годзе. Сродкі плануецца накіраваць на будаўніцтва заапарка, рэканструкцыю Канцэртнай залы «Віцебск» і Летняга амфітэатра, у прыватнасці, добраўпарадкаванне ў яго гасцявой ложы пакоя адпачынку для VIP-персон, а таксама адміністрацыйнага будынка па вул. «Праўды», 5а, помніка архітэктуры па вул.Сярэдненабярэжная, 7 пад «Дом гарадской культуры і побыту канца XIX – пачатку XX стагоддзяў».

Інвестыцыі на аб'екты аховы здароўя і адукацыі складуць адпаведна 8,1% і 8,4%, пры гэтым у параўнанні з 2013 годам удзельная вага выдаткаў на медыцыну скароціцца амаль удвая, а на навучальныя ўстановы павялічыцца прыкладна ў такой жа прапорцыі. Сярод уключаных у праграму аб'ектаў аховы здароўя – рэканструкцыя тэрапеўтычнага корпуса гарадской клінічнай бальніцы хуткай медыцынскай дапамогі, здраўпункта гарадской паліклінікі №6 і шэраг іншых. Акрамя пачатку работ па ўзвядзенні дзіцячага садка ў Білева-2, інвестыцыі ў адукацыйную сферу будуць накіраваны на рэканструкцыю адміністрацыйнага будынка па вул. Залатогорскай, 3а і Дзіцячай школы мастацтваў №6.

У адрозненне ад 2013-га, у інвестпраграму бягучага года не ўвайшлі такія прыкметныя аб'екты, як Палац урачыстых абрадаў, падземны пераход №2 па вул. П. Баўкі, вуліца Гагарына, мост

«Паўночны».

Сяргей Кочетов, "Віцебскія весці"