У Глыбокім адкрылі новы будынак раённага суда
"Менавіта такія будынкі судоў мы плануем будаваць у будучыні. Ён узведзены па спецыяльным праекце - сучасны і строга функцыянальны. Тут ёсць усё, што неабходна для правасуддзя, і ў той жа час зроблена прыгожа і зручна. Людзі, якія ўваходзяць у гэты будынак, будуць з павагай ставіцца да права, да такіх каштоўнасцей, як справядлівасць, правасуддзе. Можна сказаць, што, размяшчаючы ў такіх будынках судовыя ўстановы, мы вядзем у тым ліку прававое выхаванне", - сказаў Валянцін Сукала.
Стужку пераразаюць старшыня Палаты прадстаўнікоў Уладзімір Андрэйчанка, старшыня Вярхоўнага суда Беларусі Валянцін Сукала, старшыня Глыбоцкага райвыканкама Алег Мархат і намеснік старшыні Віцебскага аблвыканкама Уладзімір Пянін Валянцін Сукала (у цэнтры) Двухпавярховы будынак у Глыбокім пабудаваны ў сціслыя тэрміны - за 10 месяцаў. "У нас ёсць сваё бачанне, свая праграма па рэканструкцыі і будаўніцтве новых будынкаў судоў. Галоўная наша будоўля - Палац правасуддзя ў Мінску. Думаем увесці яго праз год у лістападзе. Акрамя гэтага, будуем Палац правасуддзя ў Брэсце. А ў канцы гэтага года пасля капрамонту ўводзім пяць будынкаў буйных судоў. Мы ідзем не столькі шляхам новага будаўніцтва, колькі шляхам рэканструкцыі і мадэрнізацыі ўжо існуючых будынкаў. Прыводзім іх у сучасны выгляд, абсталёўваем аргтэхнікай", - адзначыў старшыня Вярхоўнага суда.
Ён распавёў, што ў новых будынках зусім іншыя ўмовы для ўдзельнікаў судовага працэсу, ёсць магчымасць дапытваць сведак, якія знаходзяцца пад абаронай. "Тэхналогіі, камп'ютарнае аснашчэнне, праграмы і база - усё сучаснае, усё, каб мы ішлі ў нагу з часам.Пераходзім на электронны дакументазварот. Гэта правасуддзе наступнага пакалення, наступнага стагоддзя", - дадаў Валянцін Сукала.
Працягваючы тэму правасуддзя будучыні, ён падкрэсліў, што ў самым працэсе не павінна быць нічога залішняга. "Важна, каб усё было проста, зразумела і даступна людзям. Гэта, мне здаецца, галоўнае. Людзі могуць выходзіць з залы суда з рознымі пунктамі гледжання, з розным настроем, але ў іх павінна быць адчуванне таго, што справядлівасць адбылася, - перакананы старшыня Вярхоўнага суда. - Сёння мы шмат працуем над медыяцыяй, над спыненнем спраў, не даводзячы іх да судовага рашэння. Гэта больш сучасна, больш спрошчана, больш аператыўна".
Старшыня Палаты прадстаўнікоў Нацыянальнага сходу Уладзімір Андрэйчанка ў сваю чаргу запэўніў, што кожны чалавек мае права разлічваць на дапамогу і падтрымку з боку дзяржавы. "Будаўніцтва такіх цудоўных будынкаў сведчыць аб тым, што ўлады вялікую ўвагу надаюць пытанням развіцця прававой дзяржавы. Таму што толькі ў прававой дзяржаве, дзе створаны нармальны клімат, існуе здаровая грамадская абстаноўка, можна эфектыўна вырашаць задачы сацыяльна-эканамічнага развіцця", - сказаў ён.
У адпаведнасці з дэкрэтам аб удасканаленні судовай сістэмы Беларусі з 1 студзеня 2014 года да Вярхоўнага суда перайшлі функцыі арганізацыйнага, матэрыяльна-тэхнічнага і кадравага забеспячэння дзейнасці судоў агульнай юрысдыкцыі. Гэта рашэнне дазволіла актыўна ажыццяўляць будаўніцтва новых будынкаў судоў, а таксама праводзіць капітальны і бягучы рамонты. З 2014 года па цяперашні час пабудавана шэсць новых будынкаў судоў, праведзены капітальны рамонт 17 будынкаў.