У Глыбокім зьявіцца помнік вішні

 У Глыбокім 21 ліпеня урачыста адкрыюць манументальна-дэкаратыўную скульптуру "Вішня". Нядаўна жыхары Глыбокага назвалі вішню сімвалам свайго горада. А каб канчаткова замацаваць за сабой гэты брэнд, вырашылі правесці ў сябе "Вішнёвы фестываль", які будзе доўжыцца цэлы тыдзень – з 21 па 27 ліпеня. "Вішнёвыя" гулянні пачнуцца з адкрыцця помніка вішні.

Як паведамілі ў аддзеле ідэалагічнай работы, культуры і па справах моладзі Глыбоцкага райвыканкама, вышыня дэкаратыўнай кампазіцыі будзе больш за 2 метры. Матэрыял – сілумін. Скульптура будзе ўяўляць сабой цыліндрычную тумбу, стылізаваную пад дрэва, на якой будзе размешчана галінка спелых вішань з лісточкамі. Сілумінавыя "ягады" будуць чырвонымі, а "лісце" – зялёнымі. Усё, як у прыродзе. Аўтар кампазіцыі – скульптар з Віцебска Іван Казак.

На памяць аб фестывалі ў Глыбокім таксама з'явіцца вуліца Вішнёвая. Яна будзе размяшчацца ва ўсходняй частцы горада, перпендыкулярна вуліцы Вясёлцы. Гэта па суседстве з вішнёвым садам, у якім каля 1500 дрэў. Яго жыхары Глыбокага пасадзілі ў красавіку гэтага года, спецыяльна да "Вішнёвага фестывалю".

У праграму свята ўвойдзе мноства тэматычных мерапрыемстваў: выбар "Вішнёвай каралевы", вішнёвая кірмаш, выстава вішнёвых сувеніраў, конкурсы кулінарнага, фатаграфічнага, мастацкага, ландшафтнага і нават цырульніцкага майстэрства, галоўнай гераіняй якіх, вядома ж, стане вішня.