У Гарадоцкім раёне фестываль «Гарадоцкі Парнас» сабраў аматараў народнай творчасці, паэзіі і фальклору
На мерапрыемстве традыцыйна збіраюцца сотні жыхароў раёна і госці з Беларусі і Расіі, каб прадэманстраваць свае таленты і здзівіцца талентам іншых. Фестываль — візітная картка раёна, ён прысвечаны мясцоваму ўраджэнцу — паэту, аўтару папулярнай у ХIХ стагоддзі паэмы «Тарас на Парнасе». Міфічная гара, дзе адбываецца дзеянне ў творы, — сімвал творчай вяршыні. Таму фестываль прадстаўляе самадзейнае мастацтва ва ўсіх яго праявах — ад вершаў і танцаў да традыцыйных рамёстваў і нацыянальнай кухні.
Ужо некалькі гадоў свята арганізуюць ва ўрочышчы Вераб'ёвы горы на ўскраіне райцэнтра. У маляўнічым кутку на беразе возера адкрыліся дзясяткі тэматычных інтэрактыўных зон, у тым ліку для дзяцей, выставы-продажы вырабаў народных майстроў, гастранамічнае падвор'е «Юшка для Тараса», дзе наведвальнікам прапаноўвалі прадэгуставаць дзясяткі варыянтаў любімай многімі юшкі і г. д.
Фестываль наведаў старшыня абласнога Савета дэпутатаў Уладзімір Церанцьеў. Ён падкрэсліў, што з году ў год гэтая падзея прыцягвае ўсё больш гасцей. Таксама кіраўнік дэпутацкага корпуса прыадкрыў таямніцу — раённыя і абласныя ўлады прыкладаюць максімум намаганняў, каб права правесці адзін з бліжэйшых Дзён беларускага пісьменства даверылі менавіта Гарадоччыне.
У фестывалі таксама прынялі ўдзел: дэпутат Палаты прадстаўнікоў Нацыянальнага сходу Ірына Палякова, дэпутат Савета Рэспублікі Нацыянальнага сходу Анатоль Шчасны, начальнік галоўнага ўпраўлення ідэалагічнай работы і па справах моладзі аблвыканкама Марына Новіцкая, начальнік упраўлення культуры аблвыканкама Пётр Падгурскі.
Падчас урачыстай цырымоніі адкрыцця старшыня райвыканкама Пётр Корабач уручыў памятныя падарункі і статуэткі «Зорны Тарас» лаўрэатам прэміі «Зямляк года». Прэмія ўручаецца як ураджэнцам раёна, так і людзям, якія ўнеслі значны ўклад у развіццё Гарадоцкага краю. У бягучым годзе ўзнагароды ўдастоіліся былы кіраўнік МНС Беларусі Уладзімір Вашчанка, які ў юнацкія гады жыў у аграгарадку Бычыха, і знакаміты беларускі мастак Віктар Шылка, які нарадзіўся ў вёсцы Загор'е.
Пасля афіцыйнай часткі наступіла чарга конкурсаў, у прыватнасці «Гаспадара лесу» (менавіта з лесам была звязана прафесійная дзейнасць галоўнага героя паэмы «Тарас на Парнасе»), народнай творчасці «Ці ведаў хто з вас, браткі, Тараса?» і «Доўгая каса — дзявочая прыгажуня» на прызы раённай газеты «Гарадоцкі веснік». Таксама адной з цэнтральных падзей стала работа паэтычнай пляцоўкі «Вераніцынская зорка».
