У гарадскім пасёлку Варапаева Пастаўскага раёна ўрачыста адкрылі станцыю абезжалезвання вады

Падарункі любяць усе. Асабліва, калі атрымліваюць тое, пра што марылі даўно, але самі сабе набыць не маглі. Вось такі жаданы падарунак атрымалі напярэдадні Новага года жыхары Варапаева ад дзяржавы. Практычна напярэдадні свята ў гарадскім пасёлку здалі ў эксплуатацыю станцыю абезжалезвання і амаль 7 км водаправодных сетак.

Як адзначыў на мерапрыемстве старшыня аблвыканкама Мікалай Шарстнёў, жыхары Варапаева атрымалі самую сучасную станцыю, якой яшчэ няма ў нашай вобласці. Тэхналогія ачысткі ў ёй унікальная, што дазволіць насельніцтву мець практычна крыштальна чыстую ваду.

На ўрачыстую цырымонію разразання сімвалічнай стужкі і пуску ў эксплуатацыю станцыі прыйшлі многія гараджане. Практычна 1300 чалавек, а гэта палова жыхароў Варапаева, выкарыстоўвае для жыццядзейнасці ваду з крана. А яна раней нямала засмучала сваёй якасцю.

Старая станцыя і водаправодныя сеткі ўжо не забяспечвалі жаданай чысціні. Уся надзея ў гараджан была на падпраграму "Чыстая вада" Дзяржаўнай праграмы "Камфортнае жыллё і спрыяльнае асяроддзе" на 2016–2020 гады. І яна ажыццявілася. За сродкі рэспубліканскага і абласнога бюджэтаў, уласныя сродкі УП "Віцебскаблводаканал" была пабудавана станцыя і заменена палова труб водаправоднай сеткі, працягласць якіх у гарадскім пасёлку складае 14, 4 км. Агульны кошт работ склаў 1242,1 тыс. рублёў.

У блізкай перспектыве, падкрэсліў старшыня Пастаўскага райвыканкама Сяргей Чапік, павялічыцца колькасць дамоў, куды прыйдзе чыстая вада. У планах мясцовай улады закольцаваць у агульную сетку ўчастак, які забяспечвае вадой раён чыгуначнай станцыі.

"Віцебскія весці". Фота газеты і Віцебскага аблвыканкама.