У Лепельскім раёне рэалізуюць буйны інвестыцыйны праект

У КУВП «Бароўка» Лепельскага раёна пачата рэалізацыя вялікага інвестыцыйнага пілотнага праекта на агульную суму каля 24 млрд рублёў.

- Наша задума рэалізуецца ў рамках праграмы «Падтрымка рэгіянальнага і мясцовага развіцця ў Беларусі» за кошт сродкаў Міжнароднага праекта тэхнічнай дапамогі, які фінансуецца Еўрапейскім саюзам, і ўласных грошай калектыву, - распавёў начальнік вытворча-тэхнічнага аддзела прадпрыемства Андрэй Балотнік.

У мінулым годзе на семінары ў Мінску, разам з прадстаўнікамі Еўрасаюза, міністэрстваў эканомікі, энергетыкі, жыллёва-камунальнай гаспадаркі, транспарту і іншых аналізавалася сітуацыя ў абласцях для распрацоўкі праграмы ўстойлівага развіцця рэгіёнаў. Асноўная яе частка – пілотныя праекты. Былі прапанаваны чатыры напрамкі: развіццё турызму, веладарожнага руху, абыходжанне з адходамі і зялёная энергетыка. А вось ідэі павінны былі з'явіцца на месцах.

- Мы выбралі зялёную энергетыку, паколькі энэргарэсурсы дарагія, і калектыў увесь час шукае шляхі зніжэння выдаткаў і затрат, павышэння эфектыўнасці і эканоміі, - падкрэсліў Андрэй Леанідавіч. - Мы ўвесь час цікавімся новымі распрацоўкамі, і гэты праект у нас не першы. Ня так даўно, да прыкладу, з дапамогай сродкаў інавацыйнага фонду была запушчана лінія па вытворчасці пелет з адходаў драўніны. Наогул вялікую ўвагу надаём мясцовым відам паліва і аднаўляльным крыніцам энергіі. Таму і нарадзілася прапанова па перапрацоўцы саломы: здрабніць яе, брыкетаваць, а потым выкарыстоўваць як паліва на кацельнях прадпрыемстваў. Спыніліся на мабільнай перасоўнай устаноўцы, якая працуе непасрэдна ў полі. Гэта значыць, адпадае неабходнасць транспартаваць сыравіну кудысьці на перапрацоўку і арганізоўваць вытворчыя памяшканні. Трактар пад'язджае прама да пудзіла, без папярэдняй сушкі салома здрабняецца і прэсуецца ў брыкеты. Каб спальваць іх з найбольшай эфектыўнасцю, мы прадугледзелі таксама замену пяці старых, якія вычарпалі свае тэхнічныя рэсурсы катлоў на некаторых кацельнях.

Нямалаважны аспект: у прадпрыемства назапасілася вялікая дэбіторская запазычанасць па сельгаспрадпрыемствах. Рэалізацыя праекта дазволіць дасягнуць узаемнай выгады: камунальнікі атрымаюць паліва, сельгасвытворцы – магчымасць гасіць даўгі шляхам узаемазалікаў пры разліках за салому.

Усяго на конкурс ідэй было пададзена 25 прапаноў з усіх абласцей нашай краіны. Спецыяльная камісія іх аналізавала, і пасля кансультацыі з галіновымі міністэрствамі Рэспублікі Беларусь адбіраліся прыярытэтныя напрамкі – іх аказалася 16. Атрымала адабрэнне і ідэя лепельчан.

У вёсцы Бароўка ўжо пабывалі прадстаўнікі Еўрапейскага саюза, азнаёміліся з дзейнасцю камунальнага прадпрыемства, яго вытворчымі пляцоўкамі і магчымасцямі, абмяняліся думкамі з мясцовымі спецыялістамі. Тады і было вылучана яшчэ адно прапанова: больш актыўна выкарыстоўваць сонечную энергію.

Усяго па праекце ў КУВП «Бароўка» ўжо на наступны год будуць працаваць два перасоўных комплексы па брыкетаванні саломы, а на трох кацельнях прадпрыемства з'явяцца сучасныя катлы для іх эфектыўнага спальвання. На цэнтральнай кацельні вёскі Бароўка будзе ўстаноўлена сістэма фотаэлементаў і цеплавой помпа для атрымання цеплавой і электрычнай энергіі, на кацельні мікрараёна артбазы – геліякалектары, якія цалкам змогуць забяспечыць гарачай вадой два 60-кватэрных жылых дома.

Як паказваюць разлікі, усё гэта дазволіць знізіць сабекошт 1 Гкал цяпла да 13%, скараціць дэбіторскую запазычанасць сельгаспрадпрыемстваў за кошт выкарыстання прыналежнай ім сыравіны ў вытворчасці брыкетаў, паменшыць спажыванне паліўна-энергетычных рэсурсаў на выпрацоўку цеплавой энергіі на 5-6 %.

Фінансаванне праекта сумеснае: 21 млрд рублёў замежных інвестыцый на закупку абсталявання, правядзенне конкурсаў, тэндараў і г.д.; 3 млрд рублёў самога прадпрыемства пойдуць на выраб праектна-каштарыснай дакументацыі і выкананне будаўніча-мантажных работ.

У цяперашні час сфарміравана спецыфікацыя на пастаўку абсталявання, падпісана пагадненне, праведзены тэндары, якія выйгралі польскія і італьянскія фірмы. Перасоўныя комплексы па брыкетаванні саломы па графіку прыйдуць у Бароўку ў лістападзе, цеплавыя катлы – у снежні бягучага года. Пастаўка сонечных калектараў і электрастанцыі плануецца на люты-сакавік, а завяршэнне праекта – на ліпень 2016 года.

Алена Целядко, «Віцебскія весці».