У Лепельскім раёне ў фармаце круглага стала адбылося абмеркаванне маючай канстытуцыйнай рэформы
Такія сустрэчы праводзяцца невыпадкова. Ідзе падрыхтоўка да Усебеларускага народнага сходу, які павінен стаць пляцоўкай для рэальнага дыялогу па выпрацоўцы стратэгіі развіцця краіны. Жыццё не стаіць на месцы, узнікае неабходнасць пераўтварэнняў. Але да гэтага пытання трэба падыходзіць разумна, цывілізавана, шляхам дыялогу і дыскусіі, падкрэсліў на сустрэчы старшыня абласнога Савета дэпутатаў Уладзімір Церанцьеў.
У працэсе гутаркі ўзнімаліся розныя тэмы, сярод якіх паўнамоцтвы мясцовых органаў улады, парадак прызначэння і ўзгаднення службовых асоб і многія іншыя. І па кожным пытанні выказваліся розныя меркаванні.
Дэпутат раённага Савета дэпутатаў, старшыня Горскага сельсавета Васіль Бадзяй узняў пытанне аб гнуткасці фарміравання інстытута дэпутатаў. У сельсавеце пражываюць 3 тыс. чалавек, з іх 2200 – у вёсцы Заслонава, 320 – у Межыцы (гэта былыя ваенныя гарадок), у астатніх вёсках жыхароў мала. Утворана 11 акруг, адпаведна, 11 дэпутатаў. З іх 9 – у Заслонава, адзін – у Межыцы і адзін – на ўсе астатнія населеныя пункты.
– Як старшыні сельсавета мне было б зручней працаваць, калі б на кожныя 2–3 маленькія аддаленыя вёскі быў адзін дэпутат, чым столькі ў Заслонава, – падкрэсліў ён. – Была б магчымасць валодаць больш дакладнай інфармацыяй па чыстцы дарог зімой, добраўпарадкаванні ўсіх аддаленых населеных пунктаў у цёплы час года і іншых пытаннях.
Старшыня Каменскага сельсавета Мікалай Сініцын падтрымаў свайго калегу, а таксама ў працэсе абмеркавання гэтага пытання закрануў і тэму старэйшын, якія актыўна дапамагаюць сваім аднавяскоўцам вырашаць многія праблемы. Гэтыя людзі карыстаюцца вялікай павагай і аўтарытэтам сярод насельніцтва.
– Цяпер вялікая нагрузка ў сельсаветах – на старшыню і кіраўніка справамі. Асабліва гэта тычыцца працы з дакументамі. На тэрыторыі Баброўскага сельсавета 33 населеныя пункты, у кожны трэба дабрацца, дапамагчы вяскоўцам. У гэтым дапамагаюць дэпутаты і старэйшыны, сказала старшыня Баброўскага сельсавета Тамара Ярыга.
Да абмеркавання тэмы далучыліся ўсе прысутныя. Некаторыя былі за змяненне інстытута дэпутатаў, іншыя – за дзеючую ў цяперашні час сістэму.
Як адзначыла дэпутат Бароўскага сельскага Савета дэпутатаў, старшыня домавага камітэта Бароўкі Наталля Наймушына, у яе было шмат ідэй і прапаноў, калі ішла на сустрэчу, але ў працэсе гутаркі зразумела, што сацыяльная сістэма, якая цяпер існуе, ужо добра адладжваецца. Магчыма, колькасны склад дэпутатаў трэба мяняць, але гэтае звязуючае звяно ўсё ж неабходна ў грамадстве. Бо людзі звяртаюцца да дэпутатаў і старэйшын са сваімі просьбамі і праблемамі, давяраюць ім.
Уладзімір Церанцьеў, падводзячы вынікі, падкрэсліў, што стварэнне дыялогавай пляцоўкі прадугледжвае магчымасць абмеркаваць многія пытанні функцыянавання нашай дзяржавы. Бо ў працэсе дыскусіі нараджаюцца цікавыя і патрэбныя прапановы, якія будуць разглядацца на Усебеларускім народным сходзе.