У Лепельскім раёне ўвялі ў эксплуатацыю шматкватэрны дом і станцыю абязжалезвання
Вялікая падзея для маленькай вёскі
Доўгі час 250 жыхароў вёскі Матырына Лепельскага раёна адчувалі нязручнасці з-за таго, што з водаправодных калонак і ў дамах цякла іржавая вада. Змест жалеза ў вадзе перавышаў дапушчальныя канцэнтрацыі ў пяць разоў.
– Для пітных патрэб нам даводзілася вазіць ваду з прыродных крыніц, іншых вёсак і нават горада. І гэта пры тым, што добрасумленна плацілі за ваду, – падзяліўся жыхар вёскі Анатоль Халімоненка. – Трымаем вялікую гаспадарку, ёсць парася, куры, іншая жывёла. У цэлым жывём не горш, чым у горадзе, ёсць паравое ацяпленне, абаграваемся катлом на цвёрдым паліве, а яшчэ пліта і печка-грубка, якую распальваем, калі захачацца прыгатаваць бабку. Так што мы з цяплом ужо даўно. А цяпер будзем і з якаснай вадой.
– Для нашага маленькага населенага пункта гэта вялікая падзея, – адзначыла загадчыца дзіцячага садка, дэпутат Баброўскага сельвыканкама Надзея Галай, якая прыйшла на мерапрыемства разам з дзецьмі. І хоць яны яшчэ не зусім разумелі важнасць моманту, але ім працягваць справы, пачатыя дзядулямі і бацькамі, а чыстая вада – залог здароўя і дабрабыту ўсіх.
У нашай вобласці надаецца асаблівая ўвага дзяржпраграме «Чыстая вада», падкрэсліў старшыня абласнога Савета дэпутатаў Уладзімір Церанцьеў. З аднаго боку – гэта здароўе людзей, з другога – вырашэнне бытавых праблем, бо перавышэнне ў вадзе жалеза адмоўна адбіваецца на працы пральных машын і іншай бытавой тэхнікі. З 2016 года, як адзначыў Уладзімір Уладзіміравіч, у вобласці пабудавана больш за 100 станцый абезжалезвання. Да канца бягучага года 95% сельскіх жыхароў Віцебшчыны будуць забяспечаны якаснай вадой, якая адпавядае ўсім нарматыўным патрабаванням, а да 2023-га якасную ваду атрымаюць 96% насельніцтва, у гарадах гэтая лічба дасягнула 98%.
– Нягледзячы на сусветны эканамічны крызіс, на Лепельшчыне не згорнута ніводная сацыяльная праграма, – падкрэсліў у сваім выступленні перад сельскімі жыхарамі старшыня Лепельскага райсавета дэпутатаў Ігар Урбан. – Сёлета здаём у эксплуатацыю трэцюю станцыю абезжалезвання (раней уведзены ў строй у населеных пунктах Горкі, Чэрэйшчына), што дазволіла забяспечыць якаснай вадой больш за тысячу сельчан.
Станцыя абезжалезвання ў Матырыне ўзведзена за кошт бюджэтных і ўласных сродкаў «Віцебскаблводаканала».
Дом, дзе пасялілася шчасце
Нават кіраўніцтва раёна, якое перад Новым годам прымала рашэнне аб будаўніцтве на вул. М. Горкага ў Лепелі 40-кватэрнага дома для шматдзетных сем'яў, сумнявалася ў поспеху, на тое былі прычыны. Але ўсё склалася. І новенькі прыгажун дом з поўным рамонтам, з добраўпарадкаванай прылеглай тэрыторыяй, дзіцячай пляцоўкай і паркоўкай нават на месяц раней за тэрмін здадзены ў эксплуатацыю. Навасёлам – 39 шматдзетных сем'яў – на Дзень маці ўручылі ключы ад кватэр. Гэты ўрачысты момант падзялілі з імі прадстаўнікі абласной улады, член Савета Рэспублікі Нацыянальнага сходу Рэспублікі Беларусь, дэпутат абласнога Савета дэпутатаў Юрый Дзеркач, старшыня райвыканкама Міхаіл Кісялевіч.
– Гэта несказаны падарунак для ўсіх нас, – прызналася шматдзетная маці Таццяна Козлава, прымаючы сімвалічны ключ з рук дырэктара генпадраднай арганізацыі Лепельскай ПМК-75 Анатоля Ламекі. – Наяўнасць уласнага жылля – гэта дабрабыт кожнай сям'і. Мы бязмерна ўдзячныя дзяржаве і кіраўніцтву раёна за магчымасць рэалізаваць сямейны капітал на будаўніцтва кватэры. Мара нашай сям'і, як і многіх іншых, ажыццявілася.
Яшчэ адна шматдзетная маці Ганна Ляхава атрымала трохпакаёвую кватэру. У сям'і чацвёра хлапчукоў, чакаюць пятае дзіця. Старэйшы Глеб, якому 7,5 гадоў, невымоўна рады ўласнай кватэры ў цэнтры Лепеля. Бо да гэтага яны пражывалі ў камерцыйным жыллі ў вёсцы Межыца, што за 20 км ад райцэнтра. Цяпер Глеб плануе з сябрамі наведваць розныя гурткі пасля школы. Сям'я ўжо набыла мэблю, гатова ў найбліжэйшыя выхадныя перабірацца ў горад.
Сярод шчаслівых новасёлаў і шматдзетныя сем'і Маркус, Малашанка, дзе па трое дзетак, і многія іншыя, якія разам з бацькамі і бабулямі ў гэты дзень у сваіх кватэрах будавалі планы на будучыню.
– Няхай у гэтым доме паселіцца шчасце, – пажадаў новасёлам старшыня райвыканкама Міхаіл Кісялевіч.
На Віцебшчыне за дзевяць месяцаў атрымалі кватэры 824 шматдзетныя сем'і (за такі ж перыяд мінулага года – 529). З уводам у строй 40-кватэрнага дома ў Лепелі чарга на атрыманне жылля сярод шматдзетных сем'яў скарацілася на траціну.