У асабістых дапаможных гаспадарках закладзены велізарны эканамічны патэнцыял - А.Косінец

10 чэрвеня, Віцебск /Дзіяна Курыло - БЕЛТА/. У асабістых падсобных гаспадарках закладзены велізарны эканамічны патэнцыял. Аб гэтым заявіў сёння на чарговай сесіі Віцебскага абласнога Савета дэпутатаў старшыня аблвыканкама Аляксандр Косінец, перадае карэспандэнт БЕЛТА. "Асабістая падсобная гаспадарка - гэта эканамічнае паняцце, крыніца таварнай і грашовай масы", - сказаў Аляксандр Косінец. Аднак для таго, каб вядзенне гаспадаркі было выгадным для людзей, неабходна ствараць умовы і выправіць пралікі. Адной з вялікіх памылак Аляксандр Косінец лічыць будаўніцтва дамоў без гаспадарчых пабудоў. "Пара перастаць будаваць " шпакоўнi" без скляпоў, без клецяў і з хлявамі 3х4 м, якія не прыстасаваны для ўтрымання жывёлы. На вёсцы неабходна ўзводзіць сядзібы, каб чалавек адчуваў сябе гаспадаром і з гэтым пачуццём выхоўваў сваіх дзяцей", - дадаў ён. Губернатар са шкадаваннем адзначыў, што сучасныя сельскія дзеці не ўмеюць касіць, даіць кароў. "Развіццё буйнатаварнай вытворчасці з'яўляецца прыярытэтам, па гэтым шляху ідуць усе развітыя дзяржавы, аднак нацыянальны менталітэт прадугледжвае гаспадаранне на зямлі, і гэта імкненне мы будзем усяляк падтрымліваць", - падкрэсліў Аляксандр Косінец. Ён лічыць недапушчальнымі факты, калі кіраўнікі гаспадарак або старшыні сельсаветаў адмаўляюць людзям у забеспячэнні іх жывёлы кармамі або апрацоўцы ўчасткаў. Губернатар лічыць таксама неабходным аказваць дапамогу ў вядзенні асабістых падсобных гаспадарак і ўладальнікам прыватных дамоў у горадзе і дачнікам. Арганізацыя гандлю насеннем, забеспячэнне ўгнаеннямі і кармамі, дапамога ў набыцці маладняку жывёлы і арганізацыя закупак звышкаў - усё гэта павінна знаходзіцца ў цэнтры ўвагі кіраўнікоў раёнаў, сельгаспрадпрыемстваў, дэпутатаў мясцовых саветаў. Амаль 42% сельскага насельніцтва вобласці лічаць дзяржаўную падтрымку ў развіцці асабістых падсобных гаспадарак дастатковай, столькі ж апытаных не змаглі даць сваю ацэнку. На думку Аляксандра Косінца, гэта сведчыць аб тым, што людзі дрэнна інфармаваныя аб мерах падтрымкі. "Неабходна прапаганда вядзення асабістых падсобных гаспадарак, трэба рэкламаваць моцных гаспадароў, і яны могуць у поўнай меры прэтэндаваць на званне "Чалавек года Віцебшчыны", - лічыць губернатар. Па дадзеных камітэта па сельскай гаспадарцы і харчаванні аблвыканкама, у Віцебскай вобласці з 1995 года колькасць асабістых падворкаў скарацілася на 52,6 тыс. Да пачатку 2010 года ў асабістых падсобных гаспадарках засталася траціна пагалоўя буйной рагатай жывёлы да ўзроўню 1995 года, удвая паменшылася пагалоўе свіней.-0-