У Лёзненскім раёне адкрылі капліцу на месцы былой Стасеўскай у гонар Пакрова Прасвятой Багародзіцы царквы
Складаны лёс быў у царквы, у памяць пра якую сёння адкрылі капліцу. Пабудавана яна была ў 1860 годзе і ўяўляла сабой драўляны будынак на каменным фундаменце з двума купаламі і 5-ю званамі. Пасля рэвалюцыі 1917 года гісторыя царквы няўмольна пачала хіліцца да завяршэння. У чэрвені 1922 года з царквы канфіскавалі 15 прадметаў з срэбра вагой 1,9 кг. для збору сродкаў галадаючым Паволжа. У канцы 30-х гадоў царква была зачынена. Мясцовыя старажылы ўспамінаюць, што ў гады вайны ў царкве стаялі коні. Пасля вайны яе разабралі, з бярвёнаў зрабілі медпункт, а пазней сталовую і стайню.
– Месца, дзе сёння мы адкрываем капліцу, сапраўды святое і знакавае. Побач знаходзіцца грамадзянскія могілкі і адзіныя ў Беларусі могілкі афіцэраў. Цяпер усе, хто прыязджае сюды памінаць сваіх продкаў, і жыхары аграгарадка маюць месца, дзе прыхіліць калені і памаліцца, – адзначыў старшыня Віцебскага абласнога Савета дэпутатаў Уладзімір Цярэнтаў.
За праведзеную працу па ўзвядзенні капліцы Уладзімір Цярэнтаў асабіста падзякаваў і ўручыў грамату ад раённага выканаўчага камітэта і Савета дэпутатаў натхняльніку праекта і дырэктару ТАА «Віцебскія насенне траў» Сяргею Седукову. А пасля старшыня Лёзненскага райвыканкама Сяргей Зямчонак уручыў граматы за значны асабісты ўклад у адраджэнне духоўнасці Лёзненскага раёна дырэктару прыватнага прадпрыемства «Машынабудаўнічая кампанія «Віцебскія пад'ёмнікі» Андрэю Сідараву, кіраўнікам сялянска-фермерскіх гаспадарак «Раднічок» і «Аромафлора» Юрыю Сямёнаву і Вадзіму Седукову.
Завяршэннем мерапрыемства стала асвячэнне каплічкі. Для асвячэння памятнага месца былі запрошаны настаяцель Свята-Успенскага кафедральнага сабора протаіерэй Міхаіл Марціновіч і благачынны Лёзненскага благачыння іерэй айцец Вячаслаў.