У Лёзненскім раёне адкрылі вяровачны гарадок
Вяровачны гарадок айчыннай вытворчасці набыты на прэмію, якой адзначылі аграгарадок як лепшы ў сваёй намінацыі на рэспубліканскім конкурсе па добраўпарадкаванні за 2017 год.
Трэць з 17 610 руб. можна было падзяліць паміж калектывамі, якія актыўна ўдзельнічаюць у падтрыманні парадку і прыгажосці, але з іх адабрэння і пры падтрымцы Дабрамыслінскага сельвыканкама сродкі выдаткаваны на карысны падарунак – перш за ўсё дзецям, а заадно ўсім тутэйшым прыхільнікам здаровага ладу жыцця.
Тэсціраванне вяровачнага гарадку прайшло ў прысутнасці прадстаўнікоў раённай і мясцовай улады, кіраўніцтва школы, вучняў. Па словах намесніка дырэктара раённага фізкультурна-спартыўнага клуба Антаніны Шэндрыкавай, адчуванні выдатныя, спадабаецца кожнаму. Комплекс перададзены на баланс аддзела адукацыі Лёзненскага райвыканкама.
