У Ліёзным прайшлі мерапрыемствы, прысвечаныя 78-й гадавіне вызвалення раёна ад нямецка-фашысцкіх захопнікаў
10 кастрычніка 1943 года доблесныя войскі 3-га Беларускага фронту, разграміўшы адборную групоўку гітлераўцаў, вызвалілі першы раённы цэнтр Віцебскай вобласці – горпасёлак Лёзна. Сёння, напярэдадні дня вызвалення, у Лёзненскім раёне прайшлі святочныя і памятныя мерапрыемствы, якія нагадалі пра падзеі Вялікай Айчыннай вайны і герояў, што аддалі сваё жыццё за нашу свабоду. Адным з самых значных мерапрыемстваў стала ўрачыстае перапахаванне астанкаў шасці воінаў Чырвонай арміі, знойдзеных 52 асобным спецыялізаваным пошукавым батальёнам паблізу вёскі Рублёва. На жаль, устанавіць прозвішчы загінуўшых не ўдалося.
Астанкі шасці невядомых герояў цяпер спачываюць на воінскіх пахаваннях у вёсцы Старь, побач з іншымі абаронцамі лёзненскай зямлі.
– Тут пахаваны больш за тысячу воінаў, якія загінулі пры вызваленні раёна ў гады Вялікай Айчыннай вайны. Сярод тых, хто спачывае на гэтых могілках, ёсць і поўны кавалер ордэна Славы Пятэнін Мітрафан Трафімавіч, – адзначыла дырэктар Лёзненскага ваенна-гістарычнага музея Вольга Самушчанка.
Ва ўрачыстым перапахаванні прынялі ўдзел старшыня абласнога Савета дэпутатаў Уладзімір Церанцьеў, кіраўніцтва раёна, грамадскія арганізацыі, прадстаўнікі сілавых структур, воінскай часці і жыхары Лёзненшчыны.
– 78-я гадавіна вызвалення Лёзненскага раёна ад нямецка-фашысцкіх захопнікаў – дата адначасова святочная і журботная. З аднаго боку, мы радуемся перамозе і дзякуем удзельнікаў вайны за нашу свабоду і незалежнасць, з другога боку, гэту падзею зацямняе цана, якую заплацілі салдаты Чырвонай арміі за мірнае неба над галавой, бо загінулі тысячы, абараняючы Лёзненшчыну. На жаль, нам не вядомы імёны шасці савецкіх воінаў, аднак мы можам ва ўяўленні ўявіць, што сярод іх могуць быць прадстаўнікі розных народаў шматнацыянальнай краіны. Сёння яны знойдуць спакой у гэтым прыгожым і ціхім месцы, – сказаў Уладзімір Церанцьеў. – Важна для нас і моладзі, што дзякуючы працы пошукавікаў і дзеянням 52 асобнага спецыялізаванага пошукавага батальёна знаходзяць спакой невядомыя воіны, устанаўліваюцца імёны, якія заносяць на пліты і абеліскі, бо многія сем'і дзесяцігоддзямі чакаюць вестачкі ад бацькоў, дзядоў, прадзедаў, каб аддаць ім даніну памяці і ведаць, што родныя знайшлі спакой.
І хоць падзеі Вялікай Айчыннай вайны ўсё далей і далей адыходзяць у мінулае, падобныя мерапрыемствы зноў нагадваюць нам пра тое, што прыйшлося перажыць нашай зямлі і людзям, якія аддалі жыццё за наша мірнае будучыню.
– Кожны другі жыхар лёзненскага краю не вярнуўся з вайны, на сённяшні дзень устаноўлены імёны больш за 32 тысяч загінуўшых у 1943-1944 гадах, аднак я ўпэўнены, што мы сабраліся тут не апошні раз, бо яшчэ шмат салдат не знайшлі свой спакой на могілках. – адзначыў старшыня Лёзненскага райвыканкама Сяргей Зямчонак. – У Лёзненскім раёне пошукавыя работы будуць працягвацца, бо вайна не скончыцца, пакуль не будзе пахаваны апошні салдат.
Удзельнікі мерапрыемства ўшанавалі памяць загінулых хвілінай маўчання, перад пахаваннем шасці савецкіх воінаў, благачынны Лёзненскай благачыннай акругі айцец Вячаслаў правёў заупакойную літыю. Пасля чаго на магілы салдат былі ўскладзены вянкі і кветкі.
Яшчэ адной знакавай падзеяй гэтага дня стаў мітынг і цырымонія ўскладання вянкоў і кветак на Цэнтральных воінскіх пахаваннях у Лёзне, дзе спачывае больш за паўтары тысячы салдат. Пашанаваць памяць загінулых прыйшлі школьнікі з партрэтамі герояў, мясцовыя арганізацыі, органы ўлады, прадстаўнікі сілавых структур, вайсковай часці і жыхары гарпасёлка.
З 78-й гадавінай вызвалення Лёзненскага раёна ад нямецка-фашысцкіх захопнікаў ад імя абласных Савета дэпутатаў і выканкама прысутных павіншаваў іх зямляк – намеснік старшыні Віцебскай абласной арганізацыі РГА «Белая Русь», член прэзідыума абласнога савета ГА «Беларускі саюз афіцэраў» Генадзь Ягораў.
– Боль вайны застанецца з намі назаўжды. Няма сям'і, якую б не закранула вайна. Мая сям'я з Лёзна, мама пахавала падчас вайны пяцярых братоў, а бацька вызваляў родную зямлю і ваяваў пры дапамозе БМ-13, больш вядомай як «Кацюша», – расказаў Генадзь Міхайлавіч землякам. – Сёння я прайшоўся па родных мясцінах і радаваўся таму, што традыцыі працягваюць жыць, а Лёзненшчына абнаўляецца.
У гонар знамянальнай падзеі на Цэнтральнай плошчы ў Лёзне разгарнулася свята. Кожны жадаючы мог пакаштаваць палявую кухню, атрымаць асалоду ад святочных канцэртаў «Беларусь – гэта мы!» і «Заспяваем, сябры!», набыць тавары на выставах-продажах, паўдзельнічаць у навучальных забавах на тэматычных пляцоўках Лёзненскага РАНС, ДАІ, БРСМ, мясцовага аб'яднання прафсаюзаў і многае іншае.
10 кастрычніка святочныя і памятныя мерапрыемствы пройдуць таксама ў Лёзненскай цэнтральнай раённай бібліятэцы, сельскіх арганізацыях, клубах і дамах культуры.