У Ліёзным прайшлі мерапрыемствы, прысвечаныя 79-й гадавіне вызвалення раёна ад нямецка-фашысцкіх захопнікаў

У Ліёзненскім раёне адбыліся ўрачыстае адкрыццё памятнай дошкі першай жанчыне механіку-вадзіцелю танка, Герою Савецкага Саюза – Марыі Акцябрскай, перапахаванне астанкаў савецкіх воінаў, якія загінулі ў гады Вялікай Айчыннай вайны, і шэраг іншых мерапрыемстваў, прысвечаных 79-й гадавіне вызвалення Ліёзненскага раёна ад нямецка-фашысцкіх захопнікаў.

10 кастрычніка 1943 года войскі 3-га Беларускага фронту, разграміўшы адборную групоўку гітлераўцаў, вызвалілі першы раённы цэнтр Віцебскай вобласці – горпасёлак Ліёзна. Напярэдадні памятнай даты ў Ліёзненскім раёне прайшлі мерапрыемствы, якія нагадалі пра падзеі Вялікай Айчыннай вайны і герояў, што аддалі сваё жыццё за нашу свабоду.

Адным са значных мерапрыемстваў стала ўрачыстае прысваенне імя Героя Савецкага Саюза Марыі Акцябрскай сярэдняй школе №1 Ліёзна, а таксама адкрыццё памятнай дошкі Марыі Акцябрскай на будынку гэтай установы адукацыі.

– Сёння сярэдняя школа №1 гарадскога пасёлка Ліёзна стала 55-й школай, якой за апошнія два гады было прысвоена імя Героя Савецкага Саюза. І гэта не проста лічбы, а паказчык таго, што мы не забываем пра подзвігі герояў і шануем памяць тых, хто цаной свайго жыцця вызваліў Беларусь ад нямецка-фашысцкіх захопнікаў і дазволіў нам вырошчваць дзяцей і жыць у мірнай краіне, – адзначыў старшыня абласнога Савета дэпутатаў Уладзімір Церанцьеў.

– Менавіта з Лёзненскага раёна 10 кастрычніка 1943 года пачалося вызваленне тэрыторыі ўсёй Віцебскай вобласці ад нямецка-фашысцкіх захопнікаў. Тут дзевяць месяцаў стаяў фронт, загінула больш за 32 тыс. савецкіх воінаў. Сёння на тэрыторыі раёна знаходзіцца больш за 90 мемарыялаў і воінскіх пахаванняў, мы памятаем усіх салдат і ветэранаў Вялікай Айчыннай вайны, якія аддалі жыццё за свабоду і незалежнасць нашай краіны, – сказаў старшыня Лёзненскага райвыканкама Іван Фёдараў.

Не менш значнай падзеяй стала і ўрачыстае перапахаванне астанкаў савецкіх воінаў, якія загінулі ў гады Вялікай Айчыннай вайны пры вызваленні Лёзненскага раёна, на мемарыяльным комплексе «Адаменская горка», на якім прысутнічалі прадстаўнікі абласной і мясцовай улады, воінскай часці, грамадскіх арганізацый, пошукавых атрадаў, жыхары Лёзненшчыны, а таксама сваякі загінулых і госці з Расіі.

Астанкі 190 ваеннаслужачых Рабоча-сялянскай Чырвонай арміі, якія загінулі ў 1943 – 1944 гг., былі знойдзены ў вёсцы Альховік Лёзненскага раёна падчас правядзення палявых работ ваеннаслужачымі 52-га асобнага спецыялізаванага пошукавага батальёна і членамі мясцовага ваенна-патрыятычнага фонду пошукавага атрада «Разведчыкі Воінскай Славы» на месцы дзеючага падчас вайны палявога перасоўнага шпіталя.

– Толькі за гэты год на тэрыторыі Віцебскай вобласці дзякуючы намаганням 52-га асобнага спецыялізаванага пошукавага батальёна мы ўзнялі 461 байца і камандзіра Рабоча-сялянскай Чырвонай арміі і перадалі зямлі 481 чалавека, – адзначыў Уладзімір Церанцьеў. – Сёння мы перадалі зямлі 190 салдат і афіцэраў, якія загінулі ад атрыманых ран у шпіталі ў вёсцы Альховік. Цяпер яны спачываюць побач са сваімі таварышамі: якія змагаліся за вызваленне раёна. Тут ляжаць 818 байцоў і афіцэраў, на жаль, большасць з іх маладыя. Кожны чацвёрты – чалавек ва ўзросце ад 18 да 20 гадоў, і гэта вельмі важна распавядаць моладзі, бо гэта практычна іх равеснікі. Гэтыя юныя хлопцы маглі жыць і ствараць сем'і, але яны загінулі, вызваляючы нашу Радзіму, таму наш абавязак – працягваць праводзіць пошукавыя работы і шанаваць памяць загінулых.

"Віцебскія весці".