У Медыяцэнтры Віцебскай вобласці абмеркавалі работу са зваротамі грамадзян
Мадэратар мерапрыемства намеснік галоўнага рэдактара «Віцебскіх вестак» Юлія Новікава нагадала, што старшыня Палаты прадстаўнікоў Нацыянальнага сходу Беларусі Уладзімір Андрэйчанка ў сакавіку праводзіў асабісты прыём грамадзян у Глыбокім. Тады спікер ніжняй палаты акцэнтаваў увагу мясцовай улады і рэгіянальных СМІ на тым, каб больш распавядаць аб тым, што робіцца ў рэгіёне па вырашэнні сацыяльных пытанняў. Гэта дапаможа людзям лепш арыентавацца ў праблемах, ведаць, што робіць улада па вырашэнні таго ці іншага пытання. Такі падыход, на думку Уладзіміра Андрэйчанкі, дапаможа зняць напружанне ў грамадстве і знізіць колькасць зваротаў у вышэйстаячыя інстанцыі.
За 2022 год у мясцовыя і распарадчыя органы ўлады паступіла 40 тысяч зваротаў, паведаміла Ілона Шульга. Асоба заяўніка – гэта чалавек пажылога ўзросту, пенсіянер, інвалід. Але ўсё часцей сталі звяртацца і маладыя грамадзяне, чаму спрыяла стварэнне адзінай сістэмы апрацоўкі зваротаў. Цяпер любы грамадзянін мае магчымасць стварыць свой асабісты кабінет і праз яго звярнуцца ў любую інстанцыю рэспублікі і атрымаць адказ. Гэтым тлумачыцца рост электронных зваротаў, хоць на 35% зніжана колькасць паступіўшых заяў у вышэйстаячыя інстанцыі. У прыярытэце – вырашэнне пытанняў на месцах.
У гэтым плане са станоўчага боку можна адзначыць працу Шаркаўшчынскага райвыканкама, які выбудаваў адносіны з людзьмі такім чынам, каб напрамую атрымліваць ад іх запыты і аператыўна прымаць рашэнні, апярэджваючы звароты ў розныя інстанцыі.
Сёння паступае шмат заявак у службу 115. Вядома, што ў снежні 2018 года па рашэнні Віцебскага аблвыканкама ў структуры ЖКГ быў створаны абласны кантакт-цэнтр з адзіным нумарам 115. Начальнік службы Таццяна Скібіцкая паведаміла, што за два месяцы бягучага года ўжо паступіла 75 тысяч заявак, яшчэ 50 тысяч мелі кансультатыўны характар. Дарэчы, летась гэтая лічба склала 633 тысячы, з якіх 6 тысяч накіраваны на дапрацоўку. Больш за ўсё грамадзян хвалююць пытанні электра- і гарачага водазабеспячэння, каналізацыі і інш.
Складаны характар носяць «зямельныя» звароты. Як правіла, яны звязаны з міжасобаснымі адносінамі паміж суседзямі. Іх вырашэнне, часам, ляжыць у прававой плоскасці, праз суды, але грамадзяне з-за судовых выдаткаў рэдка туды звяртаюцца, падкрэсліў у выступленні Ігар Левенкоў. Наводзіць на разважанні той факт, што са 122 зваротаў, якія паступілі ў аблвыканкам, толькі 10 прызнаны абгрунтаванымі. Гэты факт сведчыць аб тым, што на месцах спецыялісты не заўсёды кампетэнтна і якасна разбіраюцца ў зямельных пытаннях.
"Віцебскія весці"