У Медыяцэнтры Віцебскай вобласці прайшла сустрэча прадстаўнікоў аблвыканкама і дэлегатаў «Сусветнага фестывалю моладзі – 2024»
Маштабная моладзевая падзея пройдзе па Указе прэзідэнта Расіі Уладзіміра Пуціна 1 – 7 сакавіка ў Сочы. Фестываль прыме 20 тысяч расійскіх і замежных маладых лідараў у сферы бізнесу, медыя, культуры, навукі, адукацыі, валанцёрства і дабрачыннасці, спорту, розных сфер грамадскага жыцця, дзіцячых арганізацый. У складзе дэлегацыі Віцебшчыны – 60 навучэнцаў і студэнтаў, прадстаўнікоў працоўнай моладзі.
– Ваша задача – годна прадставіць нашу краіну, – з напутным словам да моладзі звярнуўся намеснік старшыні аблвыканкама Вячаслаў Дурноў. – Упэўнены, што вы зможаце годна прадэманстраваць дасягненні вобласці і рэспублікі ў цэлым і станеце пасламі добрай волі сярод моладзі многіх краін свету. Гэта будзе вельмі запамінальная падзея. Удзел у такім мерапрыемстве прынясе яркія ўражанні і пакіне ў вашым жыцці незабыўны след.
Маладыя людзі актыўна адгукнуліся на прапанову задаць пытанні, якія тычацца ўдзелу ў фестывалі. Іх цікавіла, як праходзіў працэс фарміравання дэлегацыі нашага рэгіёну, чаму форум стаў больш маштабным, уражанні былых яго ўдзельнікаў.
Начальнік галоўнага ўпраўлення ідэалагічнай працы і па справах моладзі аблвыканкама Марына Новіцкая падкрэсліла, што ў лік дэлегатаў прысутныя маладыя людзі трапілі не выпадкова – гэта людзі з актыўнай жыццёвай і грамадзянскай пазіцыяй, патрыёты сваёй Радзімы, кожны ярка і неардынарна праявіў сябе ў студэнцкім ці прафесійным жыцці.
Намеснік старшыні Віцебскага гарвыканкама Віктар Глушын, які быў у складзе дэлегацыі вобласці на форуме 2017 года, звярнуў увагу, што дзякуючы сучасным тэхналогіям сёння значна прасцей мець зносіны і арганізоўваць падобныя форумы. Сёлета на Сусветны фестываль моладзі пададзена ў шэсць разоў больш заявак, чым на мінулы. Удзельнікаў форуму чакае знаёмства з асобамі сусветнага ўзроўню, наведванне займальных інтэрактыўных лакацый, шмат цікавых сустрэч.
Як адзначыў генеральны дырэктар Цэнтра культуры «Віцебск» Глеб Лапіцкі – удзельнік форуму 2017 года, магчымасць паўдзельнічаць у такім цікавым мерапрыемстве – гэта інвестыцыя дзяржавы ў моладзь як у будучыню краіны. Ён заклікаў дэлегатаў быць актыўнымі, удзельнічаць у камандных праектах, праяўляць фантазію і творчы падыход, а па прыездзе падзяліцца сваімі ўражаннямі і эмоцыямі.
У анлайн-фармаце на сустрэчы таксама прынялі ўдзел прадстаўнікі рэгіёнаў.
Спікеры пажадалі юнакам і дзяўчатам быць энергічнымі, жыццярадаснымі, ініцыятыўнымі, праявіць свае лепшыя якасці і тым самым спрыяць фарміраванню пазітыўнага меркавання аб Беларусі.