У Міёрах прыём грамадзян правёў намеснік Прэм'ер-міністра Рэспублікі Беларусь Ігар Петрышэнка
Часлаў Кашкур і Раіса Парфянёнка прыйшлі падзякаваць за будаўніцтва новай ЦРБ, але ад імя жыхароў раёна выказалі яшчэ і просьбу: Міёрам патрэбна новая паліклініка. У раёне налічваецца каля 20 тысяч чалавек, у тым ліку амаль сем тысяч пенсіянераў. Звыш 1,1 тысячы чалавек дасягнулі ўзросту 80 гадоў і старэй. Таму ўзмацненне паліклінічнага звяна ў блізкай даступнасці ад месца жыхарства пацыентаў — надзённая неабходнасць.
Тым больш што перспектыва развіцця раёна ў цэлым відавочная. Тут будуецца ўнікальны для Беларусі завод па вытворчасці металічнага ліста і белай бляхі. У ходзе разгляду гэтага пытання намеснік Прэм'ер-міністра разам з кіраўніцтвам Міёрскага райвыканкама абмеркавалі таксама пытанне абнаўлення сацыяльнай сферы рэгіёна ў цэлым. Ігар Петрышэнка акцэнтаваў увагу на тым, што трэба зрабіць усё магчымае для абумоўлення маладых кадраў у раёне, стварыць тут для гэтага адпаведныя ўмовы.
Пенсіянерка Алевціна Кандратовіч ужо не першы год змагаецца з суседам па зямельным пытанні. Справа разглядалася ў судзе. Рашэнне не на яе карысць, але заяўніца настойвае на сваёй праваце. Абышла шматлікія інстанцыі. Цяпер яна адмаўляецца атрымліваць дакументы на зямельны ўчастак. Міёрчанцы паабяцалі яшчэ раз вывучыць сітуацыю і дапамагчы з афармленнем папер.
Пасля завяршэння прыёму грамадзян Ігар Віктаравіч наведаў Міёрскую цэнтральную раённую бальніцу. Навабудоўля, дзе цяпер размешчаны аперацыйныя блокі, лабараторыя, рэанімацыйнае, хірургічнае, дзіцячае, прыёмна-дыягнастычнае, акушэрскае і іншыя аддзяленні, уступіла ў строй менш за год таму. Гэта стратэгічна важны для рэгіёну аб'ект, бо раней падраздзяленні бальніцы складаліся больш чым з дзесятка карпусоў і былі размешчаны ў розных месцах райцэнтра. Сучасны трохпавярховы будынак, будаўніцтва якога было пачата яшчэ ў далёкім 1992 годзе, але пазней замарожана, за кошт рэспубліканскага і абласнога бюджэту дабудавалі літаральна за пару гадоў. Узвядзенне клінікі і яе аснашчэнне абышліся больш чым у 21 мільён рублёў. У гэтым годзе тут ужо нарадзіліся 23 малыша, аднаго з іх выратавалі толькі дзякуючы высокатэхналагічнаму абсталяванню. Дзіця з'явілася на свет значна раней тэрміну і важыла ўсяго адзін кілаграм, але мясцовыя медыкі спрацавалі аператыўна, і зараз дзяўчынка набіраецца сіл ужо ў дзіцячай абласной бальніцы.
Пасля наваселля ў новай ЦРБ значна павялічыліся аб'ёмы аказання медыцынскай дапамогі, сюды ахвотна ідуць працаваць учорашнія выпускнікі ВНУ і медавучылішчаў. У апошнія тры гады штат раённай структуры аховы здароўя штогод папаўняецца ў сярэднім на 20 маладых урачоў і медсясцёр.
Намеснік Прэм'ер-міністра падчас візіту пабываў у школе і дзіцячым садку, а таксама на заводзе па вытворчасці белай бляхі, які будуецца. Прадпрыемства ўжо да канца бягучага года плануе даць першую прадукцыю, тут будзе створана каля паўтысячы працоўных месцаў. У рэалізацыю міжнароднага праекта з выкарыстаннем замежнага капіталу ўжо ўкладзена звыш 200 мільёнаў еўра. Гатоўнасць прадпрыемства — каля 80 працэнтаў. Новая вытворчасць дасць магутны імпульс развіццю рэгіёну.
Дарэчы, ужо дасягнута дамоўленасць з уласнікамі гэтага прадпрыемства аб будаўніцтве ў Міёрскім раёне нямецкага медыцынскага кардыяцэнтра. Яны бяруць на сябе ўсе выдаткі на яго ўзвядзенне. Цяпер ідзе праца над праектнай дакументацыяй, пад рэалізацыю праекта выдзелены зямельны ўчастак. Медцэнтр не толькі будзе абслугоўваць супрацоўнікаў завода і прадастаўляць шырокі спектр экспартных медыцынскіх паслуг, але і бясплатна возьме на сябе абавязкі па аказанні рэнтгенаэндаваскулярнай дапамогі жыхарам шасці бліжэйшых раёнаў Віцебшчыны.