У Навалукомльскай бальніцы актыўна працуюць 28 школ здароўя

Высокая кваліфікацыя медперсаналу, узровень аснашчэння сучасным абсталяваннем, клопат пра людзей – усё гэта складнікі агульнага поспеху: вось ужо шмат гадоў Навалукомльская ЦРБ уваходзіць у лік лепшых устаноў аховы здароўя Віцебшчыны. Пра гэта сведчаць лічбы і факты.

Так, у 2015 годзе тут было аказана платных паслуг насельніцтву на суму больш за 5 205 млн рублёў, планы па экспарце паслуг і эканоміі паліўна-энергетычных і матэрыяльных рэсурсаў выкананы адпаведна амаль на 141% і больш чым на 145%. Поўнасцю выканана праграма дзяржаўных гарантый па забеспячэнні медыцынскай дапамогай насельніцтва раёна. Працягваецца пераразмеркаванне рэсурсаў з высоказатратнай стацыянарнай дапамогі на больш эканамічную, якая ўключае прафілактыку захворванняў, амбулаторна-паліклінічную. Доля фінансавання апошняй павялічана з 30% у 2001-м да амаль 51% у цяперашні час.

Актывізавалася праца па ўкараненні стацыянарназамяшчальных тэхналогій, прафілактычных мер, накіраваных на барацьбу з фактарамі рызыкі, прыцягненне насельніцтва да здаровага ладу жыцця. За мінулы год 225 разоў дактары Навалукомльскай ЦРБ выступалі ў сродках масавай інфармацыі, прачыталі амаль 500 лекцый у працоўных калектывах, правялі 12 акцый і 30 дзён здароўя, шэсць вечароў пытанняў і адказаў, 16 «прамых ліній» і больш за 860 кансультацый па здаровым ладзе жыцця і прафілактыцы захворванняў. Працуюць 28 школ здароўя. Урачы агульнай практыкі і ўчастковыя тэрапеўты вялікую ўвагу надаюць выкананню хворымі індывідуальных праграм рэабілітацыі, папярэджанню рызыкі развіцця ўскладненняў. У выніку зменшылася колькасць абвастрэнняў са стратай працаздольнасці ў групе дыспансерных хворых на 6,9%.

На 7,8% скараціліся тэрміны часовай непрацаздольнасці, цалкам рэабілітаваны і вярнуліся да працы 8,3%, часткова рэабілітавана 15,4% хворых. Амаль на чвэрць павялічылася ў раёне колькасць асоб, сістэматычна якія займаюцца фізкультурай і спортам, прыкладна на 10% знізіўся узровень табакакурэнне, больш чым на 6% – колькасць асоб з залішняй масай цела.

– Не магу не адзначыць той поспех, які дасягнуты хірургічнай службай раёна, — падкрэсліўгалоўны ўрач ЦРБ Мікалай Пінчук. Пачынаючы з кастрычніка 2011 года выканана 290 лапараскапічных халецыстэктомій (выдаленне жоўцевага пузыра. – Заўв. аўт.). У выніку сярэдні тэрмін лячэння такіх хворых скараціўся больш чым у два разы, а эканамічны эфект склаў амаль 400 млн рублёў. Не кажучы ўжо пра тое, наколькі лягчэй пераносяцца такія аперацыі. У 2015 годзе прааперавана 143 пацыенты. Прычым не дапушчана ніводнага выпадку пасляаперацыйнай смерці ад вострай хірургічнай паталогіі органаў брушной поласці. А аперацыі з нагоды ушчамленых грыж у раёне наогул сталі адзінкавымі – за мінулы год іх было толькі дзве.

Высока ацэньвае галоўны ўрач і працу службы акушэрства і неанаталогіі, планавання сям'і. У раёне пастаянна удасканальваецца перынатальная дапамога, забяспечана даступнасць высокатэхналагічных метадаў дыягностыкі і лячэння, праводзіцца медыка-генетычнае кансультаванне, створаны выдатныя ўмовы для нараджэння дзяцей і іх выхаджвання. Медыкі праводзяць сістэматычную працу па павышэнні прэстыжу сям'і ў грамадстве, фарміраванні свядомага бацькоўства, прафілактыцы ранняй цяжарнасці ў падлеткаў. У выніку паказчык дзіцячай смяротнасці зніжаны з 2003 года ў 7,45 раза.

Акрамя таго, на Чашніччыне дасягнуты адзін з самых нізкіх паказчыкаў агульнай смяротнасці сярод раёнаў Віцебшчыны. І што асабліва важна, тут удалося забяспечыць зніжэнне смяротнасці сярод асоб працаздольнага ўзросту. Прычым па ўсіх значных у сацыяльным плане прычынах – хвароб сістэмы кровазвароту, анкалогіі. Сярэдняя працягласць жыцця ў рэгіёне за гэты час вырасла на 5,14 года.

— У пяцігодцы, якая пачалася, ва ўмовах фінансавага крызісу нашаму калектыву трэба будзе вырашаць не менш складаныя задачы, – кажа Мікалай Яўгенавіч. – Але я ніколькі не сумняваюся, што штодзённая карпатлівая праца па прафілактыцы захворванняў, ранняй дыягностыцы, дыспансерызацыі ўсяго насельніцтва, сістэма мер арганізацыйнага характару, накіраваная на павышэнне даступнасці і якасці медыцынскай дапамогі, укараненне новых сучасных метадаў лячэння, клопат аб рэпрадуктыўным здароўі насельніцтва плюс высокая адказнасць і кваліфікацыя медыцынскіх кадраў дазволяць нам эфектыўна іх выканаць.

Алена Целятка, фота аўтара. "Віцебскія весці".