У Наваполацку адсвяткаваў наваселле Тэрытарыяльны цэнтр сацыяльнага абслугоўвання насельніцтва
Ва ўрачыстай цырымоніі адкрыцця прынялі ўдзел міністр працы і сацыяльнай абароны Рэспублікі Беларусь Мар'яна Шчоткіна, намеснік старшыні Віцебскага аблвыканкама Уладзімір Церанцьеў, старшыня Наваполацкага гарвыканкама Наталля Качанава, старшыня камітэта па працы, занятасці і сацыяльнай абароне аблвыканкама Аляксандр Хрыстафораў, архіепіскап Полацкі і Глыбоцкі Феадосій, кіраўнікі прадпрыемстваў і арганізацый Наваполацка, якія ўваходзяць у апекунскі савет цэнтра.
Гаворачы аб дзейнасці службы сацыяльнага абслугоўвання насельніцтва Нафтаграда, Мар'яна Шчоткіна адзначыла, што тут для кліентаў створаны годныя ўмовы, спецыялісты НТЦСАН шукаюць і ўкараняюць інавацыйныя тэхналогіі і новыя віды паслуг, а створаны па рашэнні гарвыканкама апекунскі савет дапамагае «усім мірам» вырашаць надзённыя праблемы.
– Галоўнае, каб у вашым цудоўным новым доме спецыялісты працягвалі працаваць шчыра, ад усяго сэрца жадаючы дапамагчы людзям, – канстатавала Мар'яна Акіндынаўна.
Тэму значнасці адкрыцця новага Тэрытарыяльнага цэнтра сацыяльнага абслугоўвання насельніцтва працягнуў Уладзімір Церанцьеў:
– У Віцебскай вобласці больш за 360 тысяч чалавек маюць патрэбу ў клопаце дзяржавы і атрымліваюць яе. За няпоўныя пяць месяцаў гэта ўжо трэці па ліку аб'ект, уведзены ў сферы сацабароны разам з цэнтрам кругласутачнага прабывання для пажылых людзей у аграгарадку Крулеўшчына і домам-інтэрнатам у Дунілавічах. Атрадна, што ўлады Наваполацка вельмі трапятліва ставяцца да жыхароў горада і аказваюць ім усебаковую дапамогу.
– Для нас дарагі кожны чалавек, кожны наваполачанін, асабліва людзі, якія маюць патрэбу ў сацыяльнай падтрымцы. Пераезд у новы будынак дазволіў аб'яднаць усе аддзяленні службы, стварыць камфортныя ўмовы для гараджан, якія адносяцца да сацыяльна неабароненых слаёў насельніцтва, – падкрэсліла старшыня гарвыканкама Наталля Качанава. Яна падзякавала дырэктара КУП ЖКГ Дзмітрыя Дзямідзіва і калектыў прадпрыемства, якое выступала падрадчыкам на аб'екце, за хуткае і якаснае выкананне будаўнічых работ. Сімвалічны ключ ад утульнага дома Дзмітрый Уладзіміравіч перадаў дырэктару «службы добрых сэрцаў» Жанне Соніч.
Працягнула праграму мерапрыемства экскурсія па цэнтры, дзе акрамя пяці асноўных аддзяленняў цяпер размяшчаюцца салон «Міласэрнасць», сацыяльная цырульня, бібліятэка і пральня, кабінет псіхалагічнай разгрузкі, камп'ютарны клас і трэнажорная зала.