У Наваполацку выбралі студэнта года вобласці

Якім павінен быць лепшы студэнт года? Адукаваным, выхаваным, дысцыплінаваным, начытаным, а акрамя таго актыўным, працавітым, вясёлым, пазітыўным, камунікабельным, творчым, крыху адчайным… Ці пытаецеся, як усё гэта можа спалучацца ў адным маладым чалавеку? Можа, і такі кактэйль якасцей лёгка выявіць у многіх сучасных студэнтаў, якія паспяваюць праявіць сябе ва ўсім і не жадаюць выпускаць ні хвіліны часу. Доказ таму – абласны этап рэспубліканскага конкурсу «Студэнт года», дзе на гэтае званне прэтэндавалі прадстаўнікі пяці ВНУ Віцебшчыны.

У гэты раз сачыць за конкурсам, які адбыўся ў Полацкім дзяржуніверсітэце, давялося не толькі праз аб'ектыў фотакамеры, але і з судейскага століка: журналіста «Віцебскіх вестак» запрасілі ў склад журы. Ведалі б вы, дарагія чытачы, як цяжка падымаць таблічкі з баламі, калі ўсім хочацца паставіць адны пяцёркі, бо кожны з пяці студэнтаў быў неадразлівы і непаўторны. Прадстаўніцы ветэрынарнай акадэміі Ганна Дударчук, медуніверсітэта Святлана Наджафава, ВДУ імя П. Машэрава Таццяна Чудзікава, ВГТУ Кацярына Славіна і студэнт ПДУ Мікалай Розум падрыхтавалі партфоліо і відэаролікі пра студэнцкае жыццё, расказалі пра свае захапленні і таленты, у конкурсе красамоўства разважалі на тэму «Мая спецыяльнасць – мая гарантыя будучыні», абаранялі ўласныя праекты і ініцыятывы, а таксама дэманстравалі творчыя нумары. Усё атрымалася ярка, эмацыйна і крэатыўна, за што ўдзельнікам вялікі дзякуй. А лепшым студэнтам года вобласці па выніках выпрабаванняў стаў будучы нафтавік Мікалай Розум.

Хлопец з абаяльнай усмешкай скарыў сваёй непасрэднасцю, шчырасцю і талентамі. Сярэдні бал у вучобе – 9,0, з'яўляецца старшынёй студэнцкага савета інжынерна-тэхналагічнага факультэта ПДУ, членам савета ўніверсітэта, удзельнікам навукова-практычных канферэнцый, акрамя гэтага, актыўна гуляе ў КВЗ, спявае ў студыі эстраднага спеву «Настроение» і дапамагае моладзі правесці лета ў студатрадах, узначальваючы штаб працоўных спраў ПДУ. І сам не супраць папрацаваць: мінулае лета Мікалай Розум правёў у Ямала-Ненецкай аўтаномнай акрузе на Усерасійскай моладзевай будоўлі «Бованенкава», у выніку стаў пераможцам рэспубліканскага конкурсу «Працоўны семестр-2014» у намінацыі «Лепшы камісар атрада, які працаваў за межамі Рэспублікі Беларусь». Цяпер Мікалай мае намер скарыць яшчэ адну вяршыню – рэспубліканскі этап «Студэнт года», дзе прадставіць Віцебскую вобласць. А пакуль можна адправіцца ў падарожжа па маршруце Талін – Рыга – Стакгольм: менавіта такі галоўны прыз дастаўся яму ад турыстычнай фірмы «Ілва».

На вышыні аказаўся і Віцебскі тэхналагічны ўніверсітэт, які два гады запар утрымліваў першую пазіцыю, а сваю перамогу, як мы памятаем, Ганна Мядзялец з цягам часу пацвердзіла на розных конкурсах не толькі рэспубліканскага, але і міжнароднага ўзроўню. На гэты раз хочацца павіншаваць ВНУ з яшчэ адной цудоўнай студэнткай – аўтаркай сацыяльнага праекта «Квест «Таямніцы Беларусі», удзельніцай вакальнай студыі «Вялікая перамена», валанцёрскага атрада «Сэрца без межаў» Кацярынай Славінай, у якой за плячыма нямала перамог у навуковай і творчай дзейнасці і, упэўнена, яшчэ больш наперадзе. Менавіта ёй мы і вырашылі ўручыць спецыяльны прыз ад «Віцебскіх вестак». Трэцяе месца заняла студэнтка ВДУ ім. П. Машэрава, старшыня студэнцкага савета і студэнцкага навуковага таварыства юрыдычнага факультэта Таццяна Чудзікава.

– Конкурс, які праводзіцца ўжо не першы год, з'яўляецца значнай падзеяй у студэнцкім асяроддзі і накіраваны на развіццё і падтрымку ініцыятыў, інтэлектуальнага і творчага патэнцыялу моладзі. Яго чакаюць і да яго рыхтуюцца, – адзначыў в.а. першага сакратара абласнога камітэта БРСМ Дзмітрый Туранок. – У Год моладзі адборачныя туры ў ВНУ выклікалі вялікую цікавасць, паўдзельнічаць у абласным этапе імкнуліся больш за 30 чалавек. У выніку мы ўбачылі лепшых з лепшых, і ўсе яны пераможцы.

Няма магчымасці не пагадзіцца. І, думаецца, усе прадстаўнікі старэйшага пакалення, гледзячы на хлопцаў, наставальгіравалі па гадах сваёй юнасці. Бо, як справядліва адзначыў рэктар ПДУ Дзмітрый Лазоўскі, прывітаўшы гасцей, студэнцтва – гэта такі час, які хутка заканчваецца, але пакідае ўражанні на ўсё жыццё.

Вольга Маслоўская, «Віцебскія весці». Фота аўтара.