У Полацку пройдзе фестываль праваслаўнай культуры "Колас"
Фестываль праваслаўнай культуры "Кладезь" пройдзе ў Полацку з 9 па 16 лістапада, паведаміла карэспандэнту БЕЛТА галоўны спецыяліст аддзела ідэалагічнай работы, культуры і па справах моладзі Полацкага райвыканкама Валянціна Уласенка.
Арганізатары падрыхтавалі разнастайную духоўна-асветніцкую праграму, мерапрыемствы якой будуць арганізаваны ва ўстановах адукацыі, культуры і медыцыны, аддзяленні дзённага знаходжання інвалідаў, воінскіх часцях, аддзеле ўнутраных спраў райвыканкама.
Полацкаўцы і госці горада змогуць наведаць канцэрты і кінапаказы, пабываць на сустрэчах-гутарках з пісьменнікамі, псіхолагамі, педагогамі, святарамі.
Па традыцыі фестываль суправаджае аднайменная выстава-кірмаш. Яна размесціцца ў Палацы культуры ААТ "Полацк-Шкловалакно". У фестывальныя дні тут будуць праходзіць малебны аб здароўі перад абразамі з часціцамі мошчаў святых апосталаў Пятра і Паўла, святога велікамучаніка і лекара Панцеляймона, Сімяона Верхатурскага. На выставе будуць арганізаваны прадстаўленні лялечнага тэатра "Батлейка" і культурна-гістарычная экспазіцыя - "Скрыпторый" (майстэрня па перапісцы рукапісаў у манастырах). Тут жа можна будзе набыць вырабы ручной работы, створаныя ў манастырскіх майстэрнях.
Праваслаўны фестываль "Кладезь" адлічвае сваю гісторыю з 2008 года. За гэты час у ім удзельнічалі госці з больш чым 60 гарадоў Беларусі.
Алена Ціханава