У Полацку прайшоў 2-і Міжнародны фестываль майстэрства сярод будучых спецыялістаў лясной гаспадаркі
На працягу пяці дзён падчас спаборніцтваў па прафмайстэрстве «Лесаруб» навучэнцы дэманстравалі практычныя ўменні ў працы з бензапілой, валцы дрэва на лесасецы. На квэст-спаборніцтвах «Лясная сцежка» паказвалі веды па прадметах ляснога профілю.
І хоць расійскія госці ў асобных відах дэманстравалі выдатныя вынікі, абсалютным пераможцам у камандным заліку спаборніцтваў «Лесаруб» стала дружына Полацкага дзяржаўнага ляснога каледжа – філіяла Беларускага дзяржаўнага тэхналагічнага ўніверсітэта. Яркімі зорачкамі каманды нашых землякоў былі Вікторыя Корсак (на фота) – у конкурсе «Лесаруб» яна заняла 1-е месца ў практыкаванні «Мантаж пілавога ланцуга» і 2-е – у «Раскряжеўцы камбінаваным рэзам». Характэрна, але дзяўчаты з «пераможным» імем ужо не першы раз уваходзяць у склад каманды і з годнасцю яго апраўдваюць. Беспрэчным пераможцам па выніках пяці практыкаванняў гэтага ж конкурсу стаў палачанін Мікалай Габлееў.
У квэст-спаборніцтвах «Лясная сцежка» лідарам стала каманда ДПАУ «Міжрэгіянальны цэнтр кампетэнцый – тэхнікум імя С. Каралёва» (Маскоўская вобласць).
Фестываль стаў унікальнай пляцоўкай не толькі для маладых талентаў, якія змаглі праявіць сябе і падзяліцца прафесійным досведам, але і для педагогаў, якія прайшлі стажыроўку на базе ўстановы адукацыі.
У Полацкім лясным каледжы юнакі і дзяўчаты атрымліваюць запатрабаваную спецыяльнасць «тэхнік лясной гаспадаркі». Ёсць магчымасць атрымаць і рабочыя прафесіі. Для юнакоў гэта вальшчык лесу, для дзяўчат – ляснік. А вось дзякуючы таму, што выпускнікі і навучэнцы ўстановы адукацыі ўваходзяць у зборную Беларусі вальшчыкаў лесу і двойчы станавіліся чэмпіёнамі свету, цікавасць да гэтага напрамку, у тым ліку і з боку дзяўчат, – асаблівы. Гурткі па рабочай прафесіі вальшчыкаў пад назвай Lumberjack (у перакладзе – «Лесаруб») вось ужо некалькі гадоў тут вядзе выкладчык спецыяльных дысцыплін «Механізацыя лясной гаспадаркі» Антон Чатырбок. Ён жа – трэнер каманд каледжа.