У Полацку прайшоў абласны форум маладых спецыялістаў «Маладзёжь. Ініцыятыва. Развіццё»

Полацкі раён, як адзначыў на адкрыцці форуму другі сакратар абласнога камітэта БРСМ Уладзімір Бабічаў, стаў пляцоўкай для арганізацыі абласных маладзёжных мерапрыемстваў ужо трэці раз за год, таму што тут працуюць сапраўдныя прафесіяналы, якія ўкладваюць душу ў сваю справу, умеюць на высокім узроўні рэалізаваць заяўлены праект і падзяліцца багатым вопытам з тымі, хто да іх прыязджае.

Раней у раёне праводзіліся конкурс «Уладар сяла» і форум працоўнай сельскай моладзі, цяпер увагу прыцягнула маладзёжная палітыка горадаўтваральнага ААТ «Полацк-Шкловалакно», дзе працуюць 3900 чалавек, у тым ліку больш за 30% – да 31 года.

– Страціш моладзь – страціш будучыню. Таму мы стараемся не эканоміць на нашай будучыні, а пастаянна інвеставаць у яе, ствараць умовы для развіцця патэнцыялу маладых спецыялістаў, – агучыў пазіцыю кіраўніцтва намеснік генеральнага дырэктара прадпрыемства Андрэй Кузьмін.

 

 

І растлумачыў, што сістэма падтрымкі, адаптацыі і настаўніцтва дае вынік: не менш за 82% кадраў замацоўваюцца на вытворчасці, моладзь актыўна праяўляе сябе і ў прафесійнай, і ў грамадскай дзейнасці. Адным з брэндавых праектаў стаў уласны завадскі форум «Моладзь. Ініцыятыва. Развіццё», які праводзіцца на працягу чатырох гадоў.

Каб паказаць, як ён праходзіць, гаспадары прапанавалі гасцям акунуцца ў атмасферу жыцця калектыву. Адчуць вытворчую моц найбуйнейшага прадпрыемства хімічнага комплексу Беларусі ўдзельнікі мерапрыемства змаглі падчас экскурсіі па заводскіх цэхах. А затым усіх сабраў адкрыты дыялог «Моладзь Віцебшчыны. Традыцыі і будучыня», які прайшоў у нестандартнай форме.

 

 

Замест прасторнае прамовы тут гучалі кароткія нефармальныя прывітанні, справаздачы замяняліся эфектнымі прэзентацыямі, заахвочваліся гумар, кемлівасць, інтэрактыў. Да прыкладу, незабыўныя эмоцыі падарыла супольнае выкананне заводской візіткі: пасля таго, як маладзёвыя лідары Вольга Герашчанка і Аляксей Шуранаў прадэманстравалі каронны нумар у стылі рэп, услед за імі паўтараць запальныя танцавальныя рухі з энтузіязмам узяліся і зала, і прэзідыум.

Працягнулі праграму трэнінгі па зняцці напружання, зарадцы энергіяй і пабудове каманды. Крэатыўная вядучая Юлія Кулькіна-Трызно ўмела трымала аўдыторыю ў тонусе, накіроўваючы да пастаўленай мэты. І сапраўды, да канца дня групы, на якія разбілі незнаёмых адзін з адным маладых людзей, аб'ядналіся, згуртаваліся, навучыліся дзейнічаць разам. А ў выніку супольнай творчасці стварылі выдатныя «Платна дружбы», дзе змясцілі сімвалы яднання, шчасця, любові, дабра, росту і развіцця. На прэзентацыі карцін хлопцы прызнаваліся, што знайшлі ў Полацку новых сяброў, атрымалі зарад бадзёрасці, запазычылі шмат ідэй для далейшай працы.

 

 

 

Падводзячы вынікі форуму, намеснік начальніка аддзела галоўнага ўпраўлення ідэалагічнай працы і па справах моладзі абл­выканкама Ірына Сафейчанка падзякавала палачанам за цёплы прыём і выдатную арганізацыю мерапрыемства, пажадала маладым людзям і надалей праяўляць актыўную жыццёвую пазіцыю, уносячы свой уклад у паспяховае сацыяльна-эканамічнае развіццё малой радзімы і ўсёй краіны.

"Віцебскія весці".