У Полацку ўсіх ахвотных запрашаюць на «Начную лыжню»

У Год міру і стваральніцтва ў Полацкім раёне рэалізуюць серыю фізкультурна-аздараўленчых мерапрыемстваў «Спартыўная краіна – здаровая нацыя». За ёмістым назовам — яркія і крэатыўныя спартыўныя падзеі. Адну з іх упершыню правядуць у Полацку ўжо ў гэтую пятніцу, 3 лютага. Больш за сотню палачан, дружных са спортам і ЗЛЖ, рыхтуюцца да займальнага квэсту «Начная лыжня».

Ідэя мерапрыемства, якую актыўна падтрымала кіраўніцтва раёна, належыць Полацкаму фізкультурна-спартыўнаму клубу «Прыдзвінне». Яго дырэктар Аляксей Ванько расказаў:

— Квэст «Начная лыжня» – гэта захапляльная сваёй дынамікай гонка, на якую запрашаем усіх ахвотных. Ужо сёння можна казаць пра тое, што цікавасць праявіла больш за сто энтузіястаў. Яны стартуюць ад помніка «Клятва партызан», а фінішуюць паблізу знака ў гонар памежнікаў усіх пакаленняў на набярэжнай насупраць Сафійскага сабора. Цікава, што ў экіпіроўцы апроч стандартных лыж не абыдзецца без налобных ліхтароў. Спаборніцкі стыль будзе вольным, фармат гонкі – мас-старт.

У дапамогу лыжнікам — карта-схема з абазначэннем цікавых з гістарычнага пункту гледжання аб'ектаў на тэрыторыі парку імя 50-годдзя Савецкай Улады (паблізу Кургана Няскораных). У кожнага з іх трэба будзе зрабіць сэлфі. Таксама на кропках задання ўдзельнікі змогуць знайсці пэўныя літары, каб па выніках усяго мерапрыемства сабраць з іх фразу «Мір і стваральніцтва».

Арганізатарамі мерапрыемства выступілі полацкія райаб'яднанне прафсаюзаў, райарганізацыя ГА «БРСМ», упраўленне па адукацыі Полацкага райвыканкама, райарганізацыя РГА «Белая Русь» і ФСК «Прыдзвінне».

Снегу для таго, каб гонка ўдалася, дастаткова, супакоілі арганізатары. Выдатнае надвор'е, а сіноптыкі абяцаюць невялікі мінус, таксама настроіць усіх на спартыўна-пазітыўны лад. Адчуць рамантыку вечаровых лыжных прагулак, атрымаць асалоду ад зімовай прыроды і аздаравіцца змогуць і пачаткоўцы, і сапраўдныя «гурман» снежных трас. Эмоцыі, уражанні ад «Начнай лыжні» будуць незабыўнымі, абяцае Аляксей Ванько:

— Але пра прыемнае напаміне мы ўсё ж паклапаціліся. Значок з лагатыпам мерапрыемства прэзентуем удзельнікам на фінішы. Замерзнуць не атрымаецца! Усіх чакае гарачы чай ад Полацкай райарганізацыі ГА «Чырвоны Крыж», а таксама агульнае фота ў святле ліхтароў: на фоне нашай культурна-духоўнай і турыстычнай жамчужыны — Сафійскага сабора.

"СБ"