У прыярытэтах развіцця – прыцягненне інвестыцый і стварэнне ўмоў для эканомікі ведаў

На сесіі дэпутаты зацвердзілі праграму сацыяльна-эканамічнага развіцця вобласці на 2016-2020 гады. Яе асноўная задача - аднаўленне эканамічнага росту і стварэнне неабходных умоў для фарміравання новай эканомікі ведаў і паслуг.

"Галоўны прыярытэт - гэта інвестыцыі. У першую чаргу гаворка ідзе аб прамых замежных інвестыцыях, стварэнні сумесных прадпрыемстваў. Каб аднавіўся эканамічны рост, нам неабходна штогод прыцягваць парадку Br2 млрд інвестыцый у асноўны капітал. Гэта новыя прадпрыемствы, сучасныя вытворчасці, высокапрадукцыйныя працоўныя месцы, валовы рэгіянальны прадукт, даходы і якасць жыцця насельніцтва", - адзначыла старшыня камітэта эканомікі.

"Праграмай прадугледжана выкананне задання па сярэдняй зарплаце да канца года каля Br900. Зрабіць гэта плануецца за кошт развіцця рэальнага сектара эканомікі - прадугледжаны рост аб'ёмаў вытворчасці не менш чым на 7%, павышэнне прадукцыйнасці працы, павелічэнне выручкі, нарошчванне экспартных паставак. У цэлым - упор на эканамічную эфектыўнасць. Узровень рэнтабельнасці па ўсіх сектарах эканомікі плануецца не менш 7%", - падкрэсліла Анжаліка Нікіціна.

Старшыня Віцебскага абласнога Савета дэпутатаў Уладзімір Цярэнцьеў адзначыў, што вобласць актыўна супрацоўнічае з прыгранічнымі рэгіёнамі Расіі. "Адчуваецца зацікаўленасць расіян у наладжванні сувязяў і пашырэнні ўзаемадзеяння, у тым ліку ўзаемавыгаднага эканамічнага супрацоўніцтва. У гэтыя дні дэлегацыя нашай вобласці на чале са старшынёй аблвыканкама знаходзіцца ў Валгаградзе, неўзабаве запланавана паездка прадстаўнікоў рэгіёну ў Цвер", - сказаў Уладзімір Цярэнцьеў.

Алена Ціханава - БЕЛТА.