У рамках форуму рэгіёнаў Беларусі і Расіі «Віцебскія весці» падпісалі пагадненне з калегамі Пскоўскай вобласці

Аб'ектыўнасць, праўда і стварэнне. Гэтыя словы сталі лейтматывам у ходзе работы секцыі «СМІ як значны фактар міжрэгіянальнага ўзаемадзеяння, фарміравання агульнай інфармацыйнай прасторы гуманітарных каштоўнасцей» трэцяга Форуму рэгіёнаў Беларусі і Расіі 7 чэрвеня ў Інстытуце журналістыкі Беларускага дзяржаўнага ўніверсітэта. Секцыя форуму сабрала прадстаўнікоў дзяржорганаў, грамадскіх арганізацый і рэгіянальных СМІ дзвюх краін – усяго каля 200 чалавек.

Сёння, як сцвярджалі ўдзельнікі сустрэчы, важная не толькі стваральная праца, якая ажыццяўляецца на вышэйшым дзяржаўным узроўні, але і ўзаемадзеянне на месцах. Нашы дасягненні, прыярытэты сацыяльна-эканамічнага супрацоўніцтва і праблемы простага чалавека, якія знаходзяць сваё адлюстраванне ў газетных публікацыях і тэлевізійных сюжэтах рэгіянальных журналістаў, выклікаюць жывую цікавасць у грамадстве. Таму асаблівая роля ў працэсах беларуска-расійскай інтэграцыі належыць рэгіянальным сродкам масавай інфармацыі.

«Нам не дадзена прадбачыць, як наша слова адзавецца» – класікай стала фраза паэта Фёдара Цютчава. Ці так гэта? Прадбачыць напэўна – немагчыма. Але з дастатковай ступенню верагоднасці прадбачыць наступствы неабходна. Напрыклад, калі нехта крычыць у лесе, то, хутчэй за ўсё, ён пачуе эха. Калі ён крычыць у месцах магчымага сыходу лавіны, то наўрад ці паступае разважліва.

Кожнае слова ў наш час мае вагу і значэнне. Новыя тэхналогіі вельмі хутка распаўсюджваюць інфармацыю, якая можа быць стваральнай або ўводзіць людзей у зман. Таму гэтак важна праўду называць праўдай, а скажэнню рэчаіснасці даваць адпор, заявіла, звяртаючыся да ўдзельнікаў форуму, міністр інфармацыі Рэспублікі Беларусь Лідзія Ананіч. Не сакрэт, што часам не толькі ў інтэрнэце, але і на старонках газет, у тэлевізійным эфіры праходзіць інфармацыя аб невырашальных супярэчнасцях ва ўзаемаадносінах нашых краін.

Супрацоўніцтва ж, нягледзячы на асобныя «шумавыя перашкоды», не толькі працягваецца, але і выходзіць на новы ўзровень. Раней заключаны і рэалізуюцца дагаворы ў інфармацыйнай і друкаванай

сферах рэгіянальных СМІ Беларусі з Масквой, Санкт-Пецярбургам і Смаленскам, Рэспублікай Татарстан, Бранскай, Калінінградскай, Маскоўскай, Ніжагародскай, Ульянаўскай абласцямі. На форуме 7 чэрвеня падпісана пагадненне аб узаемадзеянні і абмене інфармацыяй паміж рэдакцыямі газет «Віцебскія весці», «Мінская праўда» і «Пскоўская праўда», а таксама «Гомельская праўда» і «Бранскі рабочы».

Няма сумненняў, што рэгіянальныя сродкі масавай інфармацыі дзвюх краін будуць працаваць на ўмацаванне дружбы і супрацоўніцтва паміж народамі, развіццё Саюзнай дзяржавы на прынцыпах аб'ектыўнасці, праўды і стварэння.

Аляксандр Іваноў, фота Дзмітрыя Восіпава, «Віцебскія вясці».