У рамках XI Міжнароднага эканамічнага форуму ў Віцебску абмеркавалі пытанні супрацоўніцтва з Архангельскам
– Гэтая сустрэча падкрэслівае важнасць эканамічных адносін. Віцебск і Архангельск звязваюць гісторыя гарадоў і краін, культурныя адносіны. Задумак, планаў і перспектыў для супрацоўніцтва ўжо вызначаны, бо кропак сутыкнення вельмі шмат. У прыватнасці, сёлета Віцебск і Архангельск адначасова адсвяткуюць дні горада. З гэтай нагоды дэлегацыі пабрацімаў наведаюць абласны цэнтр і паўночную акругу, – адзначыў старшыня гарвыканкама Мікалай Арлоў.
Акрамя таго, што Віцебск з'яўляецца самым паўночным рэгіёнам Беларусі, а Архангельск лічаць сталіцай рускай Арктыкі, гарады падобныя ў архітэктуры, па колькасці насельніцтва: у горадзе на Дзвіне пражываюць 350 тыс. чалавек, у Архангельску – 360 тысяч.
– Нашы сувязі ўжо дастаткова моцныя і трывалыя. За апошнія год-два тавараабарот паміж Архангельскай вобласцю і Беларуссю вырас у некалькі разоў. Мы актыўна ўзаемадзейнічаем і працягваем нарошчваць партнёрства, развіваць эканамічныя і культурныя сувязі, – падкрэсліў кіраўнік гарадской акругі «Горад Архангельск» Дзмітрый Марэў. – Сімвалічна, што знаёмства з Віцебскам пачалося падчас XI Міжнароднага эканамічнага форуму «Інавацыі. Інвестыцыі. Перспектывы». У Архангельску прадстаўлена мноства тавараў беларускай вытворчасці, пачынаючы ад лёгкай прамысловасці і заканчваючы прадуктамі харчавання. Дэлегацыя будзе вывучаць прадукцыю, якую прадстаўляюць таваравытворцы не толькі паўночнага рэгіёну, але ўсёй краіны. З некаторымі прадпрыемствамі ўжо наладжаны кантакты, якія дазволяць развіваць эканамічнае партнёрства, у тым ліку ў частцы набыцця спецтэхнікі. Для сябе адзначыў, што ў рэгіёне моцна развітая спартыўная сфера, у гэтым напрамку таксама будзем працаваць, бо дзеці – наша будучыня.
Падчас урачыстага адкрыцця XI Міжнароднага эканамічнага форуму адбылося падпісанне пагаднення аб супрацоўніцтве паміж Віцебскам і Архангельскам.