У Расонах сацыяльная служба цяпер аказвае паслугі нянек і дамаседак

Для пашырэння спектру паслуг у Тэрытарыяльным цэнтры сацыяльнага абслугоўвання насельніцтва Расонскага раёна з 1 лютага гэтага года ўведзены стаўкі няні і дапаможніцы. Яны і раней былі прадугледжаны ў прыкладным штатным раскладзе, але па тых ці іншых прычынах не былі запатрабаваны.

– Дапамога няні належыць сем'ям, дзе нарадзілася падвойня або трайня. Сёння ёсць паўдзесятка сем'яў, у якіх выхоўваюцца падвойні ў узросце да трох гадоў. За адным з такіх дзіцячых дуэтаў, які жыве ў Расонах, няня аформлена на паўстаўкі. Яшчэ дзве сям'і з блізнятамі знаходзяцца ў аграгарадку Краснаполле, па адной – у аграгарадку Селяўшчына і пасёлку МСА. Калі і там спатрэбяцца няні, то набярэм іх у межах іншых штатных ставак, зрабіўшы магчымыя перасоўванні не ў шкоду ўжо наяўным работнікам, – тлумачыць дырэктар цэнтра Ганна Ясінская.

Паслугі няні бясплатныя. Яна працуе не больш за 4 гадзіны ў дзень пры 5-дзённым тыдні, а калі ў сям'і трайня, то можа быць там занята не больш за 8 гадзін у дзень. Няня суправаджае аднаго з бацькоў у доглядзе за дзецьмі, нясучы адказнасць за іх жыццё і здароўе. Рэжым яе працы падпарадкоўваецца рэжыму чуйнасці і адпачынку малых. Паслугамі няні могуць скарыстацца і сем'і, якія выхоўваюць маленькіх дзяцей, адзін з якіх інвалід ва ўзросце да 4 гадоў.

З 1 сакавіка ў ТЦСАН з'явілася стаўка дапаможніцы, якая прадугледжвае аказанне сацыяльна-бытавых паслуг на даму асобам з надзвычай выяўленымі абмежаваннямі жыццядзейнасці. Аб'ём працы – ад 10 да 40

гадзін на тыдзень. У заяўлены час па дагаворы (абед – з 13.00 да 14.00) сядзелка павінна забяспечваць чысціню ў памяшканні, рэжым харчавання і гігіенічныя працэдуры пацыента, яго прагулкі ў інвалідным вазку. Пры неабходнасці – дапамагаць у прыёме ежы і лекаў, вымяраць тэмпературу і ціск, аказваць першую меддапамогу, выклікаць на дом урача і г. д. Гэтыя паслугі каштуюць 3,5 тыс. руб. за гадзіну. Адзінокія малазабяспечаныя грамадзяне, у якіх пенсія ніжэй за бюджэт пражытачнага мінімуму, маюць права на 50-працэнтную зніжку.

 – Калі стала вядома, што цэнтру патрэбны няня і сядзелка, адразу знайшлося 7 прэтэндэнтак. Выбіралі заказчыкі, бо Росаны – гарпасёлак невялікі, усе адзін аднаго ведаюць. Бацькам падвойнікаў спадабалася жанчына працаздольнага ўзросту, якая выгадавала сваіх дзяцей. А сям'я інваліда запрасіла тую сядзелку, якая калісьці даглядала яго, будучы аформленай праз упраўленне па працы і сацыяльнай абароне. У сілу абставін яна аказалася свабоднай, і яе зноў рады бачыць у гэтым доме. Праца нянь і сядзелак падзётная і кантралюемая, – сказала Ганна Ясінская.

Галіна Шпакоўская, «Віцебскія весці».