У Сянне адкрылі буйны збожжасушыльны комплекс з лініяй падрыхтоўкі збожжа і насення

У Сенне ва ўрачыстай абстаноўцы адкрыты буйны збожжасушыльны комплекс з лініяй падрыхтоўкі збожжа і насення. Па вытворчай магутнасці ён уваходзіць у топ-10 падобных аб'ектаў на тэрыторыі Беларусі і Расіі.

Праект рэалізаваны ТАА «Тэра Ностра» (дарэчы, з латыні перакладаецца як «Наша зямля») і ўключаны ў пералік перспектыўных і значных інвестыцыйных праектаў у рамках Дзяржаўнай праграмы «Аграрны бізнес». Комплекс дазваляе забяспечыць сушку 65 тыс. т насення, насеннеачыстку 40 тыс. т у год. Вытворчыя магутнасці будуць выкарыстоўвацца як для ўласных патрэб, так і для аказання паслуг. На першапачатковым этапе створана пятнаццаць новых працоўных месцаў.

«Тэра Ностра» заснавана ў 2019-м у Бешанковіцкім раёне. Праз год на Сенненшчыне створана сельскагаспадарчае прадпрыемства «Тэра Грацыя» як лагічнае працягванне кампаніі. Гэта дазволіла павялічыць пасяўныя плошчы ў тры разы. Цяпер на палях гаспадаркі вырошчваецца 15 культур, кожная мае па 2-5 сартоў.

СПК спецыялізуецца на вытворчасці высакаякаснага насення для рэалізацыі ў Беларусі і за мяжой, аказвае дапамогу ў вырошчванні зямлі, зборы ўраджаю і лагістыцы. Агульная колькасць супрацоўнікаў – 80-105 чалавек у залежнасці ад сезона. У мінулым годзе валавы збор сельскагаспадарчых культур склаў больш за 26,8 тыс. т. Сярэдняя ўраджайнасць азімага рапсу была 25 ц/га (максімальная 37 ц/га), азімай пшаніцы – 55,2 ц/га (105 ц/га), жыта – 50 ц/га (60 ц/га).

На урачыстым адкрыцці комплексу кіраўнік ТАА «Тэра Ностра» Алег Піпчанка падзякаваў калектыў і ўсіх, хто дапамагаў у рэалізацыі праекта. Ён адзначыў актыўную пазіцыю ўладаў і кваліфікаваную падтрымку «Белаграпрамбанка», якая стала адным з ключавых фактараў у стварэнні комплексу.

– Запуск збожжакомплексу дазволіць істотна змяніць структуру таварнага партфеля прадпрыемства, павысіўшы долю высокамаржынальных тавараў-насення, эфектыўнасць працы, а таксама стварыць новыя працоўныя месцы, – адзначыў член Савета Рэспублікі, начальнік рэгіянальнай дырэкцыі па Віцебскай вобласці Белаграпрамбанка Алег Жынгель.

У гутарцы з журналістамі старшыня аблвыканкама Аляксандр Субоцін адзначыў, што гэта ўнікальны комплекс не толькі для нашай краіны, але і для Расіі. «Тэра Ностра» прыйшла не на самыя лепшыя землі нават па мерках Віцебскай вобласці і дае выдатны вынік.

Па словах першага намесніка старшыні Сенненскага райвыканкама Андрэя Лебедзева, сялянска-фермерскай гаспадарцы было перададзена каля 10 тыс. га зямель збанкрутаванага раёнаграрсэрвісу. У мінулым годзе з 53 тыс. т валавога намалоту збожжавых і зернебабовых у рэгіёне амаль пятая частка прыйшлася на «Тэра Грацыя».

Фота Пятра Чымкоўскага.