У Шуміліна пасля рэканструкцыі адкрылася аптэка

Сапраўдным падарункам для шумілінцаў і жыхароў раёна стала аптэка №40, якая адкрылася на гэтым тыдні пасля рэканструкцыі ў райцэнтры.

Мадэрнізаваны будынак набыў сучасны выгляд і пашырыўся па плошчы. Цяпер тут з'явіліся памяшканне для захоўвання па стандартах, пакой водападрыхтоўкі, санвузел, пакой для персаналу. Якасна змянілася ўнутранае напаўненне. На гэтыя мэты затрачана 4 млрд рублёў, якія выдзеліла Віцебскае ўнітарнае прадпрыемства «Фармацыя». На аб'екце працавалі спецыялісты прадпрыемства «Стройсфера», якія выканалі заданне за 3,5 месяца.

У абноўленай аптэцы працуюць 15 чалавек. Для пенсіянераў на беларускія лекі дзейнічае 10-працэнтная зніжка. Кліенты задаволены. Не трэба далёка хадзіць, вялікі выбар прэпаратаў, ды і абслугоўванне на ўзроўні.

Прысутнічаўшы на ўрачыстым адкрыцці аб'екта намеснік старшыні аблвыканкама Уладзімір Церанцьеў адзначыў:

— Прыгожая, зручная, сучасная аптэка прызвана не толькі радаваць вока, але і дапамагаць людзям захоўваць здароўе. І гэта не адзіны аб'ект, які атрымаў новае жыццё. Калі праехаць па раёне, шмат дзе можна ўбачыць адрамантаваныя школы і ФАПы, рэканструяваныя і мадэрнізаваныя МТФ, устаноўленыя і абноўленыя памятныя знакі ў гонар загінуўшых землякоў. Шмат будуецца і ў вобласці. Толькі на гэтым тыдні адкрываюцца дом сямейнага тыпу ў Полацкім раёне, інфекцыйнае аддзяленне ў Расонскай ЦРБ, цэнтр здароўя ў Паставах, тут, у Шуміліне, уводзіцца ў эксплуатацыю 32-кватэрны дом, хутка будзе гатовы ФАК з басейнам. Усё гэта сведчыць аб няспынным развіцці і імкненні да паляпшэння якасці жыцця.

— У аптэку прыходзяць не толькі па лекі, кансультацыі, але і проста пагутарыць. Цяпер наведвальнікам стане значна зручней, ды і персаналу камфортней, — выказала сваё меркаванне генеральны дырэктар УП «Фармацыя» Алена Арлова. — Гэта значыць, што ва ўсіх будзе добры настрой. На бягучым тыдні адкрываюцца аптэкі ў Лепелі і гарпасёлку Руба, вядзецца капітальны рамонт цэнтральнай аптэкі Пастаўскага раёна, падыходзяць да канца будаўнічыя работы ў аналагічнай установе ў Барані. У гэтым годзе рыхтуюцца да адкрыцця 14 новых аптэк 5-й катэгорыі. На Віцебшчыне налічваецца 270 падобных аб'ектаў. Сельскае насельніцтва забяспечваецца лекавымі сродкамі праз 473 кропкі раздробнага продажу. Так што дзяржаўныя стандарты выконваюцца па вобласці больш чым на 150%, па Шуміліна – на 225.

Надзея Фондарэнка, «Віцебскія весці».