У Шумілінскай СШ № 2 імя А. Дубасарскага адкрылі новы корпус
Будаўніцтва аб'екта пачалося вясной, на піку работ тут працавалі больш за сотню будаўнікоў Шумілінскай ПМК-70. Яны таксама рэканструявалі корпус малодшых класаў, мянялі інжынерныя сеткі, каб да 1 верасня школа прыняла вучняў у абноўленым выглядзе.
Установа адукацыі даўно патрабавала рамонту і павелічэння плошчаў у сувязі з пашырэннем мікрараёна, у якім узведзены шматпавярховыя дамы. Да ўзвядзення спортзалы заняткі фізкультурай праходзілі на базе Шумілінскай СДЮШАР.
Падчас адкрыцця новага корпуса старшыня абласнога Савета дэпутатаў Уладзімір Церанцьеў адзначыў, што калектыву школы працяглы час давялося працаваць у складаных умовах. Абноўленая школа будзе служыць цяперашняму і наступным пакаленням дзяцей, бо мікрараён расце.
Уладзімір Церанцьеў уручыў дырэктару школы Жанне Рагуновіч дакументы на пяць сучасных тэлевізараў.
Адкрыццё новага корпуса праходзіла ў рамках акцыі «Нашы дзеці», якая ўрачыста стартавала ў Шумілінскім раёне з удзелам кіраўніка дэпутацкага корпуса ў СШ №1 ім. Героя Савецкага Саюза П. Акуционка. Уладзімір Церанцьеў таксама наведаў Шумілінскі раённы цэнтр карэкцыйна-развіваючага навучання і рэабілітацыі, дзе разам з намеснікам генеральнага дырэктара «Віцебскаблгаза» Святланай Волкавай уручыў выхаванцам падарункі.
У рамках акцыі «Нашы дзеці» падрастаючае пакаленне Шуміліншчыны будзе не толькі атрымліваць падарункі, але і віншаваць равеснікаў. Напрыклад, вучні сярэдняй школы №1 прыедуць да аднагодкаў, якія знаходзяцца на лячэнні ў Шумілінскай ЦРБ. А школьнікі з сярэдняй школы №2 выедуць да выхаванцаў Віцебскай спецыяльнай школы-інтэрната.
"Віцебскія весці"