У Талачынскім і Аршанскім раёнах адкрыліся новыя жывёлагадоўчыя аб'екты
Уведзена ў эксплуатацыю чацвёртая чарга МТФ «Зялёная» Талачынскага райаграсэрвісу. Комплекс лічыўся даўгабудам, але дзякуючы агульным намаганням абласных і рэгіянальных улад завершана яго канчатковае будаўніцтва. Ён складаецца з двух кароўнікаў, даільна-малочнага блока, радзільнага аддзялення, цялятніка, памяшкання для маладняку, дзесяці сенажных траншэй. На комплексе могуць утрымлівацца 768 кароў і 1000 галоў буйной рагатай жывёлы рознага ўзросту.
На ўрачыстым адкрыцці старшыня аблвыканкама Мікалай Шарснёў адзначыў, што дзякуючы тэхналагічнай замкнёнасці комплексу спецыялісты, кіраўніцтва гаспадаркі і рэгіёну павінны ставіць перад сабой задачу атрымліваць тут сярэднясутачны надой не менш за 30 л і вывесці прадукцыйнасць на 8 — 10 тыс. кг малака ў год на карову. На такую лічбу трэба наладзіцца, і тады будзе вынік, каб хутка вярнуць укладзеныя грошы і працаваць на дабрабыт гаспадаркі. У цэлым, у Талачынскім раёне пачата сур'ёзнае пераўзбраенне галіны.
Як паведаміў старшыня Талачынскага райвыканкама Алег Лындын, згодна з праграмай развіцця рэгіёну, распрацаванай у адпаведнасці з Указам Прэзідэнта Рэспублікі Беларусь ад 25 лютага 2020 года № 70, заданне па тэмпе росту сельскагаспадарчай прадукцыі да 2019-га склала 105,8%. За 10 месяцаў 2020-га выраблена больш за 25 тыс. т малака (тэмп росту 118%) і 17,3 тыс. т мяса (112%). Пагалоўе буйной рагатай жывёлы павялічылася на 1,5 тыс. і цяпер складае амаль 27 тыс.
Забыты больш за дзесяць гадоў таму свінаводчы комплекс філіяла СГЦ «Задняпроўскі» ААТ «Аршанскі КХП» ператварыўся ў магутную ферму «Дняпро». Яна складаецца з 20 памяшканняў і разлічана на 4,5 тыс. галоў буйной рагатай жывёлы. На дадзены момант «Дняпро» з'яўляецца племянным ядром для камплектавання жывёламі МТФ «Задняпроўскага» і будучага робатызаванага МТК у Чурылаве. Мікалай Шарснёў падкрэсліў, што, па сутнасці, аб'ект узводзіўся метадам народнага будаўніцтва. За кожным памяшканнем былі замацаваны арганізацыі Аршаншчыны, што дазволіла правесці рэканструкцыю высокімі тэмпамі. З улікам узвядзення сенажных траншэй і добраўпарадкавання на мадэрнізацыю затрачана 4 млн руб. Для параўнання, на будаўніцтва новай фермы на 2,5 тыс. галоў спатрэбілася б 35 млн руб. Мікалай Шарснёў адзначыў, што на падобных аб'ектах зараджаецца нізкі сабекошт прадукцыі, якая будзе канкурэнтаздольнай на ўнутраным і знешнім рынках. Нямала важна, што ферма стане своеасаблівай фабрыкай арганічных угнаенняў. Самае галоўнае, што яна ўзведзена якасна і такі метад будаўніцтва, які дае хуткі вынік, сябе апраўдаў. У далейшым атрыманы вопыт будзе распаўсюджвацца на іншыя рэгіёны, што дазволіць за кароткі час ператварыць сельскагаспадарчую галіну.
Мікалай Шарснёў і старшыня Аршанскага райвыканкама Ігар Ісачанка ўзнагародзілі лепшых пры будаўніцтве «Дняпра».
Адкрыццё новых аб'ектаў адбылося ў рамках абласнога семінара па пытаннях павышэння эфектыўнасці вытворчасці прадукцыі жывёлагадоўлі, мадэрнізацыі, рэканструкцыі і будаўніцтва ферм. На пленарным пасяджэнні, якое праходзіла ў Талачыне, у прыватнасці, абмяркоўваліся вынікі працы жывёлагадоўлі за 10 месяцаў і пастаўлены задачы на лістапад – снежань. Адзначалася, што ёсць вялікія рэзервы ў прыросьце пагалоўя і прываг. У плане абнаўлення жывёлагадоўчых аб'ектаў упор робіцца на рэканструкцыю памяшканняў гаспадарчым спосабам. Гэта дазволіць пры мінімальных затратах значна палепшыць умовы ўтрымання як дайнага статка, так і маладняка.
