У Ушачах пасля капітальнага рамонту і мадэрнізацыі адкрылі школьны стадыён
Новыя бегавыя дарожкі, пляцоўкі для валейбола, баскетбола, міні-футбола, трыбуны - стадыён пераўтварыўся да непазнавальнасці, і цяпер дзеці з вялікім задавальненнем займаюцца фізкультурай на школьным спорткомплексе. Праект мадэрнізацыі заняў два гады, а непасрэдна будаўніцтва ішло з красавіка 2021 года. Адразу пасля адкрыцця на стадыёне прайшоў адкрыты раённы турнір па футболе, а права першага ўдару па мячы далі старшыні аблвыканкама Аляксандру Субоціну, які прысутнічаў на ўрачыстай цырымоніі.
Сярод гасцей быў і памочнік Прэзідэнта – інспектар па Віцебскай вобласці Анатоль Ліневіч, які адзначыў, што развіццё спорту ў рэгіёнах – адна з асноватворных задач дзяржавы і ўлады на месцах. "Сучасныя школы даўно выйшлі за рамкі адукацыйнага працэсу. Сёння яны з'яўляюцца шматфункцыянальнымі комплексамі для людзей, якія жывуць у райцэнтрах. Яны аб'ядноўваюць бацькоў, дзяцей, педагогаў, старэйшыя пакаленні, якія збіраюцца разам, каб правесці час з карысцю для здароўя. Гэты стадыён – прыклад спартыўнага аб'екта, пабудаванага па новых тэхналогіях. Упэўнены, што на гэтым полі вырастуць футбалісты і іншыя спартсмены, якія з гонарам будуць прадстаўляць нашу краіну на спаборніцтвах рознага ўзроўню", – падкрэсліў памочнік Прэзідэнта.
Дырэктар СШ дадала, што новы стадыён у будучыні стане цэнтрам здароўя, гарманічнага духоўнага і фізічнага развіцця дзяцей і падлеткаў, а для некага і першым крокам да алімпійскіх медалёў. Тут будуць праводзіць раённыя спаборніцтвы па розных відах спорту. А на Ушаччыне сярод дзяцей і дарослых культывуюцца футбол, баскетбол, лёгкая атлетыка, кулявая стральба, самба і дзюдо, а таксама плаванне і біятлон.-0-
