У Віцебску больш за 50 школьнікаў вобласці атрымалі нямецкія моўныя дыпломы ад Пасольства Германіі
Усяго пяць школ на Віцебшчыне профільнай замежнай мовай выбралі нямецкую: гэта полацкія СШ №№16 і 18, віцебскія СШ №№34 і 45 і гімназія №4.
Навучэнцы ў рамках ініцыятывы «Школы: партнёры будучыні» Інстытута Гётэ, якая ў 2018-м адзначыла 10-годдзе, вывучаюць як лінгвістычную спадчыну, так і культуру, гісторыю Германіі, знаёмяцца з яе сучасным жыццём, маюць зносіны з аднагодкамі з гэтай краіны. Усяго ж дадзеная ініцыятыва аб'ядноўвае каля 1800 школ у 120 дзяржавах свету.
Навучэнцы СШ №45, дзе сёлета прайшла цырымонія ўручэння дыпломаў, расказалі гасцям з ФРГ, як у іх установе адукацыі пабудаваны працэс навучання нямецкай мове: тут настаўнікі, акрамя таго, што выкарыстоўваюць напрацоўкі папярэднікаў, прымяняюць сучасныя методыкі, у тым ліку праводзяць анлайн-уроки, якія дазваляюць дзецям нават дома займацца самаадукацыяй.
Таксама ў школе багатая нямецкамоўная бібліятэка, асноўны фонд якой папоўнілі кнігі, атрыманыя ад Інстытута Гётэ. Акрамя таго, на нямецкай мове дзеці і іх педагогі разыгрываюць інсцэніроўкі, спяваюць песні, што дапамагае прыцягнуць моладзь да вывучэння замежнай мовы.
Як адзначыла намеснік кіраўніка дыпмісіі Германіі ў Беларусі Ганна Лютар, у прыдзвінскіх школьнікаў высокі ўзровень валодання нямецкай, і яна вельмі ганарыцца тым, што яны выбралі для вывучэння гэту дысцыпліну, бо лічыць родную мову хоць і складанай, але перспектыўнай.
Супрацоўніцтва нашых краін, упэўнена яна, можа пашырацца не толькі ў сферы адукацыі, але і ў галіне культуры: сумесныя выставы, конкурсы, абмен бібліятэчным фондам узбагацяць міжнацыянальныя зносіны людзей і зблізяць іх.
Таксама спадарыня Лютар і яе калегі выказалі жаданне наведаць адзін з самых значных культурных фестываляў паўночнай сталіцы – «Славянскі базар у Віцебску».