У Віцебску ўшанавалі фіналістаў рэспубліканскіх прадметных алімпіяд

85 дыпломаў заваявала зборная Віцебскай вобласці на заключным этапе рэспубліканскай алімпіяды па вучэбных прадметах. У абласной філармоніі таленавітых навучэнцаў і іх педагогаў павіншавалі старшыня абласнога Савета дэпутатаў Уладзімір Цярэнцьеў, начальнік галоўнага ўпраўлення па адукацыі аблвыканкама Дзмітрый Хома, дэпутаты Нацыянальнага сходу Беларусі, калегі.

– Алімпіядны рух у вобласці на ўздыме, – адзначыў Уладзімір Уладзіміравіч. – У апошнія гады мы стабільна дадаем па выніках. Вельмі радуюць філолагі, цудоўныя матэматыкі. Сакрэт поспеху нашых дзяцей у велізарнай працы педагогаў і выкладчыкаў ВНУ, якія дапамагаюць ім у падрыхтоўцы да заключнага этапу алімпіяды. Улады заўсёды падтрымліваюць рабят і настаўнікаў, выдзяляюцца вялікія сродкі ўстановам адукацыі, дзе выхоўваюць алімпіяднікаў.

У інтэлектуальных спаборніцтвах школьнікаў удзельнічалі 216 прадстаўнікоў Віцебска і Віцебскай вобласці. Наша зборная заняла чацвёртае месца ў рэспубліцы.

Большасць пераможцаў традыцыйна на рахунку гімназістаў – 61. У лідарах віцебскія гімназіі №№8 і 2 (па 14 дыпломаў). Больш за ўсё пераможцаў падрыхтавалі віцебскія педагогі Вераніка Лакціна (настаўнік інфарматыкі гімназій №№1, 2, 8) і Міхаіл Волкаў (трэнер гімназіі №8) – па 9 пераможцаў. Безумоўны карыфей алімпіяднага руху не толькі вобласці, але і рэспублікі – матэматык Міхаіл Волкаў. На яго рахунку ўжо 200 (!) пераможцаў фіналу.

– Сакрэт такіх вынікаў просты, – тлумачыць педагог. – Трэба любіць сваю справу, дзяцей і ўвесь час развівацца. Я ж таксама пачынаў з малога.

Зрэшты, паспяховасць дзяцей і педагогаў залежыць яшчэ і ад адміністрацыі ўстаноў адукацыі. У гэтым перакананы дырэктар віцебскай гімназіі №2 Канстанцін Кісялёў.

– У нас 14 дыпломаў па васьмі прадметах. Такой шматпрофільнасцю мала хто ў рэспубліцы пахваліцца, – кажа ён. – Мая задача як кіраўніка – не замінаць таленавітым настаўнікам працаваць, стварыць для гэтых адданых прафесіі людзей камфортныя ўмовы.

"Віцебскія весці".