У Віцебску ўшанавалі найлепшых аграрыяў вобласці
Кіраўнік вобласці нагадаў, што сёння падводзяцца вынікі дажыначнага тура Віцебшчыны, старт якому быў дадзены ва ўрачыстай абстаноўцы 29 верасня ў Шаркаўшчыне:
- Мы ўшаноўваем сапраўдных прафесіяналаў хлебнай нівы, жывёлагадоўчых комплексаў, інжынераў і аграномаў, ветэрынараў і заатэхнікаў, спецыялістаў харчовых вытворчасцяў і профільных навуковых інстытутаў, кіраўнікоў гаспадарак і прадпрыемстваў – усіх вас, хто забяспечвае харчовую бяспеку нашай краіны. Ваша праца мае велізарнае значэнне для развіцця эканомікі вобласці і сацыяльнай стабільнасці ў рэгіёне. Жадаю вам моцнага здароўя, шчасця, поспехаў у дасягненні пастаўленых мэт і заваёве новых вышынь! Міру і дабрабыту! З святам!
Кіраўнік рэгіёна падкрэсліў, што 2023 год для раслінаводства Віцебшчыны аказаўся не самым спрыяльным. Для дасягнення вынікаў працаўнікі вёскі зрабілі вялікі аб'ём работ, уклалі нямала матэрыяльных затрат і каласальных чалавечых намаганняў. Вобласць у поўным аб'ёме змагла забяспечыць сябе ўласнымі насеннем збожжавых і зернебабовых культур, рапсу, бульбы, лёну, шматгадовых траў. Своечасова вырашаліся пытанні забеспячэння механізатарскімі кадрамі, дызельным палівам. На належным узроўні падтрымлівалася гатоўнасць сельскагаспадарчай тэхнікі. У тэрміны, устаноўленыя Кіраўніком дзяржавы і Урадам, удалося выканаць планы пасеву ўсіх сельскагаспадарчых культур.
Фарміраванне ўраджаю праходзіла ў найцяжэйшых умовах надвор'я з-за дэфіцыту ападкаў. З 11 красавіка па 10 чэрвеня 2023 года па вобласці выпала ўсяго 62 мм ападкаў, або 32% ад нормы. Кароткі вегетацыйны перыяд на фоне недахопу вільгаці і анамальнай спёкі не дазволілі выкарыстоўваць у поўным аб'ёме патэнцыял, укладзены ў фарміраванне ўраджаю, канстатаваў Аляксандр Субоцін:
- Але тая карпатлівая праца, якая праводзілася ў папярэднія гады па ўдасканаленні сельскагаспадарчай вытворчасці вобласці, павышэнні яе эфектыўнасці – укараненні навукова абгрунтаванай структуры пасяўных плошчаў, прымяненні высокаўраджайных сартоў раслін, высокапрадукцыйнай тэхнікі, навучанні кадраў працы ў сучасных умовах – усё гэта спрыяла таму, што ў вобласці з улікам збожжавых, крыжакветных, крупяных культур, кукурузы сабрана звыш 810 тыс. тон збожжа.
Палова ўраджаю збожжа сёлета на рахунку пяці раёнаў вобласці. , падкрэсліў старшыня Віцебскага аблвыканкама Аляксандр Субоцін на цырымоніі ўшанавання лепшых аграрыяў рэгіёна ў Віцебску.
Паводле яго слоў, сёлета ніводны раён не змог дасягнуць узроўню мінулага года па намалоце збожжа. Разам з тым ёсць і відавочныя лідары:
- Максімальны валавы збор Аршанскага раёна склаў 90 тыс. т збожжа. Вагавую прыбаўку ў агульны каравай унеслі Віцебскі раён (73 тыс. т), Талачынскі (55 тыс. т), Пастаўскі (54 тыс. т) і Дубровенскі (52 тыс. т) раёны. Толькі гэтымі пяццю раёнамі сабрана 52 працэнты атрыманага ўраджаю збожжа ў вобласці.
Кіраўнік рэгіёна таксама паведаміў, што аграрыямі вобласці сабрана 87,7 тыс. т масланасення рапсу, або 105% да ўзроўню папярэдняга года. Пры гэтым у Аршанскім раёне рапс паказаў самую высокую ўраджайнасць – 26,3 цэнтнера з гектара, а ў СВК «Ларынаўка» і ў агракамбінаце «Юбілейны» атрымана рэкордная ўраджайнасць – 39,6 і 35,7 цэнтнера з гектара адпаведна.
Выгадаваны нядрэнны ўраджай бульбы, кожны гектар якога даў амаль па 400 цэнтнераў клубняў. Асноўны вытворца бульбы РУП «Талачынскі кансервавы завод» у чарговы раз пацвердзіў сваё лідарства. З плошчы 1,1 тыс. га сабрана 50,5 тыс. т пры сярэдняй ураджайнасці 459 цэнтнераў клубняў з гектара.
Для грамадскага жывёлагадоўлі нарыхтавана травяных кармоў па 23 цэнтнера на ўмоўную галаву жывёлы. Гэтага аб'ёму дастаткова для пера зімоўкі жывёлы.
У Віцебскай вобласці сёлета на ўборцы ўраджаю працавалі больш за тысячу зернеўборачных экіпажаў. Пра вынікі найлепшых расказаў старшыня Віцебскага аблвыканкама Аляксандр Субоцін.
Паводле яго слоў, тысячны намалот перавысілі 212 экіпажаў камбайнераў, двухтысячны – 22 экіпажы. Адзін экіпаж пераадолеў трохтысячны намалот. Гэта Андрэй Шэндрык і Дзмітрый Глушакоў з «Якубава-Агра» Дубровенскага раёна, якія намалацілі 3 тысячы 17 тон:
- Абсалютны рэкорд сёлетняй уборачнай – звыш 4 тысяч тон – усталявалі Максім Серноў з агракамбіната «Юбілейны» Аршанскага раёна і Аляксандр Зябко з закрытага акцыянернага таварыства «Віцебскаграпрадукт». Максім Серноў у ліку пераможцаў жніва з 2017 года. Пачынаў сярод моладзевых экіпажаў. Другі год запар сярод пераможцаў Аляксандр Зябко. Сёлета ён заняў другое месца.
Сярод моладзевых экіпажаў найлепшы вынік у 2 тысячы 653 тоны паказаў Ілья Лазаранка з Агракамбіната «Юбілейны» Аршанскага раёна. Дарэчы, для агракамбіната гэты год знакавы, бо ў лік пераможцаў абласных «Дажынак» увайшлі чатыры яго экіпажы камбайнераў.
Сярод кіроўцаў на адвозцы збожжа ад камбайнаў высокіх паказчыкаў дабіліся Віктар Гарбачэўскі з філіяла «Задняпроўскі» Аршанскага раёна (каля 5,2 тыс. т), Сяргей Пузырэў з прадпрыемства «Прыдняпроўскі» Дубровенскага раёна (амаль 5 тыс. т). Сярод маладых кіроўцаў лідарамі сталі Андрэй Бугаеў з «Якубава-Агра» Дубровенскага раёна і Віталь Дайнека з агракамбіната «Юбілейны».
У аграпрамысловым комплексе Віцебскай вобласці неабходна актыўней фарміраваць кармавую базу.
Па словах кіраўніка рэгіёну, у вобласці захоўваецца тэндэнцыя росту вытворчасці прадукцыі жывёлагадоўлі. Па малаку дадзены паказчык мае рост вышэй за 103%. Адпаведна павялічана прадуктыўнасць дайнага статка. Нядрэнны вынік атрыманы ў вырошчванні свіней. Для павышэння эфектыўнасці галіны распрацавана праграма развіцця жывёлагадоўлі на бліжэйшую перспектыву, якая ўключае ў сябе будаўніцтва малочна-таварных комплексаў, рэканструкцыю і тэхнічнае перааснашчэнне памяшканняў для ўтрымання маладняку буйной рагатай жывёлы, свіней і птушкі. Акрамя гэтага, у рамках даручэння Кіраўніка дзяржавы па пераводзе ўсяго маткавага пагалоўя на сучасныя комплексы, зацверджаны штогадовыя графікі будаўніцтва такіх комплексаў, канстатаваў Аляксандр Субоцін:
- Мы разумеем, што неабходна ствараць трывалую кармавую базу. Таму асноўная задача – гэта нарыхтоўка кармоў, павелічэнне пасеваў люцэрны, клеверу. Сёлета, калі з-за высокіх анамальных тэмператур згарэлі травы і пашы, мы пайшлі на павелічэнне пасеваў прамежкавых культур, каб не страціць кармы.
У Віцебскай вобласці працягнуць працу па павышэнні прэстыжу працы ў аграрнай галіне.
Інструментарый для дзеянняў відавочны, перакананы кіраўнік рэгіёна:
- Неабходна сфарміраваць станоўчую матывацыю да прафесіі праз прывабную сістэму матэрыяльнага стымулявання. Сучасны крок у гэтым напрамку зроблены. Карэктыроўцы ў бок павелічэння падвергнулася зарплата механізатараў, спецыялістаў жывёлагадоўчай галіны. Сярэднямесячная заработная плата ў сельгасарганізацыях вобласці склалася на ўзроўні 1 тыс. 250 рублёў, гэта на 20% вышэй за мінулы год.
Прынцыпова новы падыход набывае і сістэма падрыхтоўкі кадраў для аграрнага сектара, адзначыў Аляксандр Субоцін:
- Сёння стаяць сур'ёзныя задачы, рашэнне якіх мы бачым у выхаванні новага пакалення аграрыяў, прыцягненні моладзі да бесперапыннай аграрнай адукацыі, прафарыентацыі навучэнцаў, пачынаючы са школьнай парты. Такая праца вядзецца. У кожным раёне функцыянуюць агракласы, з навучэнцамі праводзіцца індывідуальная праца па выбары будучай прафесіі ў сельгасатраслі.
Умацаваць такія пазіцыі павінны профільныя ССНУ, ВНУ, дзе ў два разы павялічана працягласць вытворчай практыкі. Пры гэтым яна аплачваецца ў поўным аб'ёме. А ў якасці базы выбіраюцца толькі перадавыя гаспадаркі.
Кіраўнік рэгіёна таксама падкрэсліў, што заказчыкі кадраў для сяла павінны непасрэдна ўдзельнічаць у фарміраванні каманды прафесіяналаў для сваіх прадпрыемстваў. Адзін з метадаў – мэтавая падрыхтоўка запатрабаваных кадраў:
- Віцебшчына імкнецца стварыць максімальна прывабныя ўмовы для маладых спецыялістаў. Аграпрамысловы комплекс заўсёды славіўся прафесіяналамі, чыя праца карыстаецца павагай і гонарам. Сёння перад галіной стаяць вялікія, амбіцыйныя задачы. І вырашэнне іх будзе залежаць ад ступені падрыхтаванасці нашых кадраў, іх умення працаваць і любіць тое, што робіш.
