У Віцебску ўшанавалі мам, якія нарадзілі дзяцей у Дзень народнага адзінства
Маладыя маці і нованароджаныя прымалі гасцей з аблвыканкама і Беларускага саюза жанчын.
– Хачу павіншаваць жанчын, якія сталі мамамі 17 верасня, і ўручыць ім невялікія памятныя падарункі. Хацелася б таксама сказаць вялікі дзякуй усім супрацоўнікам гэтай установы, якія дораць радасць і магчымасць стаць шчаслівымі вялікай колькасці людзей, – адзначыў старшыня Віцебскага аблвыканкама Аляксандр Субоцін і дадаў, што ў гэтым асаблівым месцы немагчыма быць змрочным і не ўсміхацца.
Ён уручыў маці гігіенічныя наборы і альбомы для дзяцей «Я – шчаслівы малыш».
– Стаць маці – найвышэйшае шчасце для кожнай жанчыны. Калі чуеш гучны смех свайго дзіцяці, разумееш, што жыццё працягваецца. Хочацца пажадаць, каб усе дзеці нашай краіны разумелі, што яны растуць у свабоднай, мірнай і квітнеючай Рэспубліцы Беларусь, – сказала старшыня абласной арганізацыі Беларускага саюза жанчын Марына Новіцкая і падзялілася, што для яе гэта хвалюючы момант, бо калісьці ў гэтым радзільным доме яна нарадзіла дачку.
Ад БСЖ маладыя мамы атрымалі ў падарунак парасоны і фартухі.
Галоўны ўрач абласнога клінічнага радзільнага дома Алена Леановіч паведаміла, што з пачатку года ў вобласці нарадзіліся каля 5 тысяч дзяцей. На працягу многіх гадоў ва ўстанове аховы здароўя адсутнічае дзіцячая і матчына смяротнасць.
У акцыі прынялі ўдзел таксама намеснік старшыні аблвыканкама Вячаслаў Дурноў, начальнік галоўнага ўпраўлення па ахове здароўя Міхаіл Вішневецкі.
