У Віцебску ўшанавалі пераможцаў акцыі «Грамадзянская мужнасць»
Адважныя ўчынкі пяцёх жыхароў Віцебшчыны адзначылі дыпломамі і памятнымі падарункамі. У намінацыі «Самы юны абаронца правапарадку» перамог Іван Гамзюк – сын начальніка ўпраўлення па працы, занятасці і сацыяльнай абароне Гарадоцкага райвыканкама Аляксея Гамзюка. 11-класнік СШ № 2 Гарадка і выхаванец ваенна-патрыятычнага клуба «Віцязь» на базе воінскай часці 5524 унутраных войскаў МУС у канцы лета выявіў на абочыне дарогі акрываўленага мужчыну. Не разгубіўшыся, юнак спыніў кровацячэнне, выклікаў хуткую дапамогу і міліцыю. Праз кароткі час, выявіўшы ў найбліжэйшым доме яшчэ дзвюх параненых нажом жанчын, юнак не разгубіўся і таксама аказаў ім першую дапамогу. Па словах Івана, у гэтым яму дапамаглі веды па медпадрыхтоўцы, якім сур'ёзна навучаюць у «Віцязе».
Дыпломам «За адвагу і рашучасць» узнагародзілі Аляксея Ганчарова. У маі 2024-га на выхадзе з гіпермаркета ён затрымаў злодзея, які выкраў дарагую бутэльку спіртнога і спрабаваў уцячы.
Васіль Мацулевіч стаў лепшым у намінацыі «За неабыякавасць», выявіўшы і вярнуўшы дырэктару аднаго з аршанскіх прадпрыемстваў згубленую барсетку з буйной сумай грошай.
Уладзімір Гірс і Ігар Кудрашоў былі адзначаны ў намінацыі «За аператыўнасць». Уладзімір прадухіліў дзеянні тэлефонных махляроў, якія падманам спрабавалі выкрасці грошы ў яго 84-гадовай маці, і затрымаў кур'ера, які прыйшоў забраць у пенсіянеркі сродкі. Дзякуючы пільнасці Ігара Кудрашова, супрацоўнікі Кастрычніцкага РАУС затрымалі жыхара Масквы, які вырабляў закладку згорткаў з асабліва небяспечным псіхатропным рэчывам – альфа-PVP. У ходзе ператрусу ў злачынцы выявілі асабліва буйную партыю наркатычнага рэчыва. У выніку злачынец быў затрыманы і панёс строгае пакаранне.
– Акцыя «Грамадзянская мужнасць» праходзіць на Віцебшчыне ўжо 17-ы раз. Тут мы ўшаноўваем людзей, якія праявілі неабыякавасць да чужой бяды, аказалі першую медыцынскую дапамогу, спынілі злачынства і дапамаглі праваахоўнікам затрымаць парушальнікаў закона. Для нас вялікі гонар узнагароджваць тых, хто не носіць пагоны, але з’яўляецца яркім прадстаўніком грамадзянскай супольнасці і ў крытычны момант думае не пра сябе, а пра іншых, – падкрэсліў начальнік УУС аблвыканкама, генерал-маёр міліцыі Андрэй Любімаў.