У Віцебску ўшанавалі ветэранаў Вялікай Айчыннай вайны

Ветэраны Вялікай Айчыннай лепш за ўсіх ведаюць цану жыцця, і іх абавязак – перадаць гэта веданне моладзі. Такое меркаванне выказаў ветэран вайны Аляксей Іваноў перад цырымоніяй уручэння юбілейных медалёў у Віцебскім гарвыканкаме.

"Калі даведаўся аб Перамозе, тады падумаў толькі – добра, што жывым застаўся. Дадому напісаў пісьмо і атрымаў вестачку ад малодшых сясцёр. Радаваўся, што з імі ўсё ў парадку, бо яны засталіся адны, бацька загінуў на вайне. І зараз год за годам мы, ветэраны, нашы дзеці, унукі і праўнукі жывём у мірнай краіне. Гэта такое вялікае шчасце! Вось пра што трэба і пра што мы заўсёды гаворым моладзі – беражыце, шануйце жыццё і памятайце аб подзвігу тых, хто вам яго падарыў", – сказаў Аляксей Іваноў.

25 лютага ў Віцебскім гарвыканкаме адбылося ўшанаванне ветэранаў Вялікай Айчыннай вайны, на якім 14 чалавек атрымалі юбілейныя медалі да 70-годдзя Перамогі з рук прадстаўнікоў кіраўніцтва абласнога цэнтра, а таксама гарадской ветэранскай арганізацыі. Сярод узнагароджаных былі ўдзельнікі партызанскага руху, франтавікі, удзельнік баёў за Берлін, малалетняя вязніца, жыхарка блакаднага Ленінграда і працаўніца тылу. Тыя, хто не змог прыйсці па стане здароўя, не застануцца без медалёў – іх уручаць асабіста кожнаму на доме.

Меркаванне Аляксея Іванова аб ролі ветэранаў у патрыятычным выхаванні моладзі падтрымалі і іншыя ганаровыя госці мерапрыемства. Яны адзначалі, як шмат ветэраны, нягледзячы на аслабелае здароўе, маюць зносіны ў школах з дзецьмі. Расказваюць, як цяжка было на вайне, як пасля яе даводзілася галадаць, аднаўляць разбуранае.

Усім ветэранам, удзельнікам Вялікай Айчыннай вайны аказваецца медыцынскае абслугоўванне. Тэрытарыяльнымі цэнтрамі сацыяльнага абслугоўвання насельніцтва раёнаў горада абследуюцца сацыяльна-бытавыя ўмовы іх жыцця, яны атрымліваюць неабходную сацыяльную дапамогу.

Кацярына Князева - БЕЛТА