У Віцебску на прадпрыемстве «ВІК – здароўе жывёл» рэалізавалі інвестыцыйны праект па вытворчасці суспензій
Дарэчы. У 2024 годзе «ВІК – здароўе жывёл» плануе выпускаць 13 найменняў прэпаратаў, вырабіць 214 тыс. флаконаў суспензій, 660 тыс. штук шпрыцаў, рассыпаць 142 тыс. штук парашка.
Створанае ў 2000 годзе замежнае прадпрыемства «ВІК – здароўе жывёл» у цяперашні час выпускае каля 94 найменняў лекавых сродкаў для жывёл і птушак (антыбактэрыяльныя, супрацьпаразітарныя, супрацьзапаленчыя, прэпараты для прафілактыкі жалезадэфіцытнай анеміі, стымулятары абмену рэчываў, анестэтыкі) і 68 найменняў сродкаў для догляду за хатнімі жывёламі. Прадукцыя прадпрыемства адпавядае сусветным стандартам GMP і пацверджана рознымі сертыфікатамі.
На прадпрыемстве забяспечаны вытворчасць і кантроль якасці ветэрынарных лекавых сродкаў. Прадукцыя, прыгатаваная асептычным шляхам (вадкія лекавыя формы вялікага і малога аб'ёму), і стэрыльная прадукцыя (вадкія лекавыя формы для ўнутранага прымянення) адпавядаюць патрабаванням вытворчай практыкі Еўразійскага эканамічнага саюза.
Гэта замежнае прадпрыемства з'яўляецца найстарэйшым рэзідэнтам СЭЗ «Віцебск», спецыялізуецца на выпуску ветэрынарных прэпаратаў, кармавых дабавак, сродкаў гігіены і санітарыі. Пад гандлёвай маркай «ВІК – здароўе жывёл» прадукцыя паступае ў краіны СНД, Блізкага Усходу, Кітай і інш.
На прадпрыемстве пастаянна рэалізуюцца інавацыйныя праекты. Адзін з такіх – сённяшняе адкрыццё цэха па вытворчасці β-лактамных СІС, стэрыльных β-лактамных інтрамаммарных суспензій у шпрыцах, участку па стэрыльнай фасоўцы прэпарата «Тыяцэфур» на плошчах лабараторна-складскога корпуса. У гэтым мерапрыемстве прынялі ўдзел старшыня аблвыканкама Аляксандр Субоцін, намеснік старшыні аблвыканкама Анжаліка Нікіціна, старшыня гарвыканкама Генадзь Сабыніч, прадстаўнікі адміністрацыі Кастрычніцкага раёна г. Віцебска, свабоднай эканамічнай зоны «Віцебск».
– Важна падтрымліваць прадпрыемствы, якія зацікаўлены ў дапамозе і выкарыстоўваюць яе для дасягнення намечаных мэт. Вы развіваецеся на нашай зямлі, ствараеце новыя працоўныя месцы і новыя віды прадукцыі. Дзякуючы вам і вашаму прадпрыемству, у тым ліку, Віцебшчына працягвае квітнець і развівацца. Упэўнены, што гэта не апошні праект, які будзе рэалізаваны на карысць вобласці і краіны, – падкрэсліў Аляксандр Субоцін.
На рэалізацыю праекта накіравана 9,2 млн рублёў, створана 15 новых працоўных месцаў, магутнасці цэха складаюць 20 тон у год прэпаратаў, а праектная магутнасць – 75 тон.