У Віцебску, Воршы і Полацку закрыты ўсе вакансіі выхавальнікаў дашкольнай адукацыі

У новым навучальным годзе ў сістэме дашкольнай адукацыі рэгіёна прыступяць да працы 145 маладых спецыялістаў, паведамілі ва ўпраўленні адукацыі Віцебскага аблвыканкама. У абласным цэнтры, Оршы і Полацку вакансіі выхавальнікаў дашкольнай адукацыі закрыты ў поўным аб'ёме, у сельскіх рэгіёнах пакуль захоўваецца некаторы дэфіцыт такіх педагогаў.

Што тычыцца забяспечанасці месцамі дзяцей, то ў цэлым па вобласці сацыяльныя стандарты ў сферы дашкольнай адукацыі выкананы ў поўным аб'ёме: дзеці пяцігадовага ўзросту падрыхтоўкай да школы ахоплены на 100%; забяспечанасць дзяцей месцамі ў дашкольных установах склала 95% (норматыў 85%).

Павелічэння колькасці месцаў у садках удалося дасягнуць за кошт будаўніцтва новых аб'ектаў (за 2009-2014 гады пабудавана 6 устаноў дашкольнай адукацыі, у 2015 годзе ўведзена ў эксплуатацыю першая чарга ясляў-сада-пачатковай школы ў Наваполацку на 257 месцаў), а таксама перакідкі дзіцячых дамоў у Оршы і Наваполацку. Дадатковыя месцы для дашкольнікаў у новым навучальным годзе з'явяцца і дзякуючы мадэрнізацыі пад размяшчэнне садковых груп часткі класнай прасторы дзяржаўных устаноў адукацыі "Базавая школа №11 г. Полацка", "Сярэдняя школа №2 г. Шуміліна".

Ва ўпраўленні падкрэслілі, што зараз у рэгіёне ідзе будаўніцтва трох устаноў дашкольнай адукацыі, кожная з якіх разлічана на 200 месцаў. Новыя аб'екты ўзводзяцца ў Віцебску (мікрараён Білева), Глыбокім і Оршы. Вядуцца праектна-пошукавыя работы па будаўніцтве дзіцячага садка на 200 месцаў у Полацку (мікрараён Аэрапорт №3).

У 2015/2016 навучальным годзе рэалізацыю вучэбнай праграмы дашкольнай адукацыі будуць весці 615 устаноў вобласці, у тым ліку 9 цэнтраў развіцця дзіцяці, 5 санаторных дашкольных устаноў, 4 спецыяльныя ўстановы дашкольнай адукацыі, 177 вучэбна-педагагічных комплексаў "дзіцячы сад-школа". У цэлым установы дашкольнай адукацыі вобласці ў новым навучальным годзе будуць наведваць больш за 48 тыс. дзяцей. У сістэме працуюць больш за 7 тыс. педагогаў.

Алена Ціханава, БЕЛТА.