У Віцебску адкрылася новая дыягнастычная станцыя тэхагляду

У абласным цэнтры адкрылася новая дыягнастычная станцыя №231 ТАА «Тэхнотэкс» па правядзенні дзяржтэхагляду. Гэта 11-ы падобны аб'ект у паўночнай сталіцы і 34-ы на Віцебшчыне, які дае зялёнае святло на ўдзел транспарту ў дарожным руху.

Сёння будынак, падмурак якога быў закладзены два гады таму, уяўляе сабой універсальны комплекс. Акрамя новай дыягнастычнай станцыі, тут размешчаны салон мэблі і дзвярэй, офісныя памяшканні розных кампаній. Аб'ект з'яўляецца абласным інвестыцыйным праектам, на рэалізацыю якога было затрачана звыш 15 млрд. Будынак стаў сапраўдным архітэктурным упрыгожаннем горада, над яго ўзвядзеннем працавалі ЧСТУП «КомГрупУлад», ТАА «СК «РУМстрой».

Выказваючы падзяку ТАА «Тэхнотэкс» за навагодні падарунак паўночнай сталіцы, намеснік старшыні гарвыканкама Зінаіда Каралёва, якая прыняла ўдзел ва ўрачыстай цырымоніі адкрыцця, падкрэсліла, што станцыя пабудавана ў рамках Дэкрэта №10 «Аб стварэнні дадатковых умоў для інвестыцыйнай дзейнасці ў Рэспубліцы Беларусь» з дзяржаўнай падтрымкай інвестара. Галоўнай прэферэнцыяй, якую ён атрымаў, стаў зямельны ўчастак без аўкцыённых таргоў.

— Прадастаўленыя дзяржавай льготы апраўданы, — дала ацэнку Зінаіда Аляксандраўна. — Капітал павінен працаваць, так хай у новага аб'екта заўсёды будзе высокая рэнтабельнасць.

Неабходнасць у дыягнастычнай станцыі, на думку дырэктара ТАА «Тэхнотэкс» Андрэя Цвячкоўскага, абумоўлена высокім узроўнем аўтамабілізацыі. Коркі на галоўных гарадскіх артэрыях у гадзіну пік, перапоўненыя паркоўкі ў дварах, чэргі на СТА — усё гэта следства імклівага росту колькасці машын. З павелічэннем аўтапарка з'яўляецца і патрэба ў дадатковых паслугах, а таксама ў абавязковых працэдурах, сярод якіх — дзяржтэхагляд. На новай станцыі адсочваюць працэс праходжання такога мерапрыемства чатыры інжынера-дыягноста на чале з начальнікам станцыі.

Характэрна, што новы аб'ект — першы на Віцебшчыне, які арыентаваны на праходжанне тэхагляду з двума лініямі дыягностыкі. Ён абсталяваны па апошнім слове тэхнікі: сучаснае італьянскае і расійскае абсталяванне, сістэмы пажарнай сігналізацыі, ацяплення, вентыляцыі, аўдыёзапісу і відэаназірання.

— Сучаснае надзейнае абсталяванне дазволіць значна павялічыць прапускную здольнасць транспартных сродкаў і паскорыць працэс праходжання дзяржтэхагляду ў цэлым, — адзначыў начальнік аддзела АГТА УП «Белцехагляд» у Віцебскай вобласці Вільгельм Кішкоўскі. — Гэта з'яўляецца гарантам бяспекі як саміх кіроўцаў, так і іншых удзельнікаў дарожнага руху.

Вольга Булаўка. Фота Дзмітрыя Восіпава. «Віцебскія весці».