У Віцебску адкрылі пляцоўку для гульні ў гарадкі

Прэзентацыя гарадковай пляцоўкі прайшла падчас святкавання Дня фізкультурніка ў віцебскай СДЮШАР №4.

У гэтай спортшколе ёсць аддзяленні баскетбола, валейбола, гандбола, вялікага і малога тэніса, а таксама шахмат і шашак. А гарадкі, па словах дырэктара СДЮШАР №4 Віктара Стрыжака, пакуль будуць прапагандаваць на грамадскіх пачатках:

— Будучы школьнікам, я выступаў за зборную Гомельскай вобласці па гарадках. І стаў сярэбраным прызёрам першынства рэспублікі. Таму, з аднаго боку, захацелася ўспомніць маладосць. А з другога, мы павінны прадастаўляць максімальна разнастайны спектр паслуг насельніцтву. Гарадкі не патрабуюць вялікіх затрат і могуць зацікавіць моладзь і людзей старэйшага пакалення.

Віктар Стрыжак распавёў, што цяжэй за ўсё было знайсці тоўсты ліставы метал для асновы пляцоўкі. Любіцельскія біты і драўляныя цыліндры, з якіх выкладваюць фігуры для выбівання, набылі ў спартыўнай краме. А вось прафесійныя біты ў СДЮШАР №4 прынёс 74-гадовы выкладчык ВДУ імя Машэрава, кандыдат у майстры спорту па гарадках Генадзь Смолін:

— Мая біта важыць 3 кілаграмы 200 грамаў. У маладосці мы падлічвалі, што прафесіяналы за трэніроўку могуць да 10 тон перакідаць. Але зараз да такіх дасягненняў мы не імкнемся. Галоўнае — здаровы лад жыцця і падтрыманне добрай спартыўнай формы.

Генадзь Смолін не супраць папрацаваць трэнерам на грамадскіх пачатках. А Віктар Стрыжак у першы час гатовы прадастаўляць інвентар жадаючым бясплатна.

У будучыні гэта ператворыцца ў платную паслугу, якую будзе аказваць СДЮШАР №4. Ці адкрыецца ў ёй аддзяленне гарадковага спорту? Ці пачнуць у Віцебску праводзіць прафесійныя турніры па гарадках? Усё залежыць ад таго, колькі прыхільнікаў з'явіцца ў гэтага незаслужана забытага віду спорту і ад іх поспехаў.

Сяргей Голеснiк, СБ Беларусь сегодня