У Віцебску адкрыўся крызісны цэнтр Чырвонага Крыжа

Складаная геапалітычная сітуацыя апошнім часам многіх вымусіла пакінуць родныя мясціны і перабрацца ў дастаткова спакойную Беларусь. У прыватнасці, з Украіны за дзесяць месяцаў бягучага года на Віцебшчыну прыбыло больш за 350 чалавек (у тым ліку каля 90 дзяцей), якія звярнуліся з хадайніцтвам аб прадастаўленні статусу бежанца, дадатковай абароны або прытулку на тэрыторыі нашай краіны. Некаторыя спачатку спыняюцца ў сваякоў ці знаёмых. Але такая магчымасць ёсць не ў кожнага, і часта замежныя грамадзяне, якія трапілі ў Беларусь, маюць патрэбу ў часовым жыллі. Цяпер дах над галавой ім змогуць прадаставіць у крызісным цэнтры на вуліцы Лаза. Ён адначасова здольны прыняць да 20 вымушаных мігрантаў. А ў выпадку вострай неабходнасці адзін з пакояў можна пераабсталяваць і стварыць яшчэ пяць спальных месцаў. У цэнтры бежанцаў гатовыя прытуліць на тэрмін да двух месяцаў — пакуль вырашацца пытанні з афармленнем дакументаў, працаўладкаваннем і пражываннем. На практыцы ж, адзначаюць супрацоўнікі Чырвонага Крыжа, усё гэта ў нас удаецца зрабіць значна хутчэй.

Будынак плошчай звыш 100 кв.м. перададзены ў арэнду абласной арганізацыі Беларускага Чырвонага Крыжа Віцебскім гарвыканкамам. Пасля рамонту і абсталявання памяшканняў усім неабходным цэнтр стаў не проста ўтульным і бяспечным жыллём для бежанцаў, але і месцам, дзе паспрыяюць іх сацыяльна-псіхалагічнай рэабілітацыі і адаптацыі ў грамадстве. Бо, акрамя трох камфортных нумароў, там маюцца таксама кухня, куткі для дзіцячых гульняў, памяшканне для адпачынку і псіхалагічнай разгрузкі, індывідуальных і групавых сустрэч з псіхолагам, правядзення апытанняў і анкетавання. Акрамя таго, паведаміла старшыня абласной арганізацыі Беларускага Чырвонага Крыжа Галіна Жаланава, камітэт па працы, занятасці і сацыяльнай абароне аблвыканкама ў рамках сацыяльнага заказу выдзяляе сацработніка, які будзе знаходзіцца ў цэнтры з 8 да 17 гадзін і дапамагаць бежанцам з вырашэннем узнікаючых пытанняў.

У адкрыцці аб'екта прынялі ўдзел намеснік старшыні Віцебскага аблвыканкама Вячаслаў Дурноў, Генеральны сакратар Беларускага Чырвонага Крыжа Дзмітрый Шаўцоў, прадстаўнікі шэрагу міжнародных структур, а таксама тых прыдзвінскіх прадпрыемстваў і арганізацый, якія дапамагалі з рамонтам і добраўпарадкаваннем крызіснага цэнтра. Прагучала нямала слоў удзячнасці ў адрас усіх, хто далучыўся да добрай справы і чый уклад дазволіў завяршыць працу ў найкароткія тэрміны.

Як сказаў Дзмітрый Шаўцоў, гэта чацвёрты падобны аб'ект у нашай рэспубліцы і на сённяшні дзень ён сапраўды з'яўляецца лепшым у краіне.

А Вячаслаў Дурноў нагадаў, што праца з вымушанымі мігрантамі не з'яўляецца чымсьці новым. У 2014 годзе была першая хваля ўкраінскіх бежанцаў, цяпер — другая. І вельмі важна, калі тым, хто сарваўся з месца, могуць падставіць плячо.

— Гэта рэальны ўклад Беларускага Чырвонага Крыжа ў праблемы міграцыйнага крызісу, — адзначыў Вячаслаў Дурноў, кажучы пра значнасць адкрытага цэнтра. — Прыярытэт нашай дзяржавы — клопат пра людзей, незалежна ад нацыянальнасці і веравызнання. Многія сёння шукаюць дапамогі, і мы гэту дапамогу павінны аказаць.

"Віцебскія весці"