У Віцебску адкрыўся XXXI Міжнародны музычны фестываль імя Івана Солерцінскага

У Віцебску адкрыўся XXXI Міжнародны музычны фестываль імя Івана Салерцінскага. Першае яго мерапрыемства, канцэрт выкладчыкаў і навучэнцаў Віцебскага дзяржаўнага музычнага каледжа, які носіць імя знакамітага земляка, прайшло сёння днём. А ўвечары ў фае абласной філармоніі студэнты факультэта дызайну і моды Віцебскага дзяржаўнага тэхналагічнага ўніверсітэта выставілі плакаты, на стварэнне якіх іх натхніла класічная музыка. Адсюль і назва выставы — «Гульня ў класіку». У такім сінтэзе мастацтваў, сцвярджаюць арганізатары, нічога дзіўнага няма. Бо Салерцінскі, які нарадзіўся ў Віцебску напачатку XX стагоддзя, скончыўшы Петраградскі ўніверсітэт і працаваўшы мастацкім кіраўніком Ленінградскай філармоніі, з'яўляўся «мастацтвазнаўцам шырокага профілю». Няпроста яго лічаць буйным савецкім музычным і тэатральным крытыкам, літаратуразнаўцам.

Адкрыццё фестывалю адбылося пасля вернісажу. На сцэну філармоніі выйшаў расійскі струнны квартэт «Акадэмія камернай музыкі». Яго артысты, якія з'яўляюцца членамі такога запатрабаванага ў галіне аўтэнтычнага выканальніцтва калектыву як MusicAeterna, з поспехам выступаюць на самых прэстыжных канцэртных пляцоўках, сярод якіх лонданскі Уігмор-хол і Берлінская філармонія. Кіраўнік калектыву Ігар Бабовіч, які нарадзіўся, дарэчы, у 1976 годзе ў беларускім горадзе Шчучын, распавёў, што ў Віцебск «Акадэмія камернай музыкі» прыехала ўпершыню:

— З Беларусі бацька-ваенны забраў мяне ў чатыры гады. Толькі ў 2007-м я пабываў у Мінску, дзе праводзіў Дні нямецкай музыкі. Пра Віцебск ведаем, што ў ім тварылі Шагал і Малевіч. Ведаем, што Салерцінскі, якому прысвечаны фестываль, быў вельмі дружны з Дзмітрыем Шастаковічам. Гэтым, вядома ж, абумоўлена з'яўленне ў нашым віцебскім канцэрце квартэта №10 Шастаковіча. Для нас, як і для любой чалавека, які мае дачыненне да Савецкага Саюза, да савецкага мастацтва, яго музыка блізкая і родная.

Акрамя Шастаковіча падчас адкрыцця «акадэмікі» выканалі творы Вольфганга-Амадэя Моцарта і Джакама Пучыні.

Фестываль у Віцебску працягнецца два тыдні. Дзясятага снежня гледачоў абласнога цэнтра чакае сустрэча з Дзяржаўным камерным аркестрам і студэнцкім хорам Беларускай акадэміі музыкі, у выкананні якіх прагучыць «Меса з Буэнас-Айрэса» Марціна Палмеры. У гэтым маштабным творы, створаным пад уражаннем ад музыкі Астора Пьяцолы, гледачы пачуюць бандонеон — інструмент, які стаў неад'емнай часткай аргенцінскага танга.

Пятнаццатага снежня традыцыйны ўдзельнік фестывалю І.Солерцінскага ансамбль салістаў «Класік-Авангард» пакажа праграму «Гія Канчэлі. Партрэт з сябрамі». Гэты грузінскі кампазітар у асаблівым прадстаўленні не мае патрэбы. Дастаткова сказаць, што ён напісаў музыку да такіх папулярных кінафільмаў, як «Міміна» і «Кін-дза-дза!». Што ж да сяброўства, згаданага ў назве, то яно звязвала Канчэлі з блізкімі па духу кампазітарамі — Альфрэдам Шнітке, Арво Пяртам і Валянцінам Сільвестpовым. Іх музыка, дарэчы, таксама прагучыць у канцэрце.

Закрыццё фестывалю адбудзецца 18 снежня. У гэты вечар беларускі піяніст Андрэй Поначэўны, які выкладае цяпер у Даласкім універсітэце, выступіць у суправаджэнні Дзяржаўнага акадэмічнага сімфанічнага аркестра Рэспублікі Беларусь. Месца за дырыжорскім пультам, па словах мастацкага кіраўніка Віцебскай абласной філармоніі Уладзіміра Бабарыкі, зойме мастацкі кіраўнік аркестра Аляксандр Анісімаў:

— Адзначым, што канцэрт № 1 для фартэпіяна з аркестрам Пятра Чайкоўскага і апошняя сімфонія Дзмітрыя Шастаковіча, якія прадставяць гледачам падчас закрыцця, прагучаць у Віцебску ўпершыню. Недзіўна, што квіткі на канцэрт ужо прададзены.

Арганізатары запэўніваюць, што фестываль імя Салерцінскага вытрымаў праверку часам. Ён з поспехам прапагандуе акадэмічнае музычнае мастацтва, развівае традыцыі, узнаўляе забытыя і адкрывае новыя імёны, уцягваючы ў культурнае жыццё маладых выканаўцаў і слухачоў.