У Віцебску адзначылі 100-годдзе з дня заснавання педыятрычнай службы горада
Няпросты шлях станаўлення прайшла педыятрычная служба з дня свайго заснавання. Менавіта з апавядання пра гісторыю яе развіцця, паказу архіўных фотаздымкаў і відэа пачалося святочнае мерапрыемства.
– Праз стагоддзе ад маленькіх бальніц і амбулаторый мы прыйшлі да таго, што сёння Віцебскі абласны дзіцячы клінічны цэнтр выконвае ўсе віды медыцынскай дапамогі дзецям ад 0 да 18 гадоў, у нас з'явілася мноства новых аддзяленняў, штогод мы набываем новае абсталяванне і ўкараняем сучасныя тэхналогіі, – адзначыла галоўны ўрач установы аховы здароўя Галіна Пузанава. – Толькі сёлета ў нас з'явіліся 12 новых апаратаў ШВЛ, 2 апараты для УГД, рэнтгенапараты высокага класа і многае іншае.
Сёння ў Віцебскім абласным дзіцячым клінічным цэнтры працуе больш за 1800 спецыялістаў, павіншаваць лепшых з іх прыйшло нямала ганаровых гасцей.
Старшыня абласнога Савета дэпутатаў Уладзімір Церанцьеў зачытаў віншавальны адрас ад дэпутацкага корпуса і Віцебскага аблвыканкама:
«Дарагія сябры! Шчыра віншуем калектыў установы аховы здароўя «Віцебскі абласны дзіцячы клінічны цэнтр» са стагоддзем з дня заснавання.
Юбілей дзіцячага цэнтра – знакавая падзея для ўсёй вобласці, за якой стаіць сто гадоў самаадданай працы ўрачоў, медыцынскіх сясцёр, малодшага персаналу ўсёй педыятрычнай службы. Ваша прафесія патрабуе высокіх кампетэнцый, з'яўляецца адной з самых адказных – гэта руплівая праца, у якой няма права на памылку. Дзякуючы прафесіяналізму медыцынскіх работнікаў, іх клопату і ўвазе выратаваны тысячы дзіцячых жыццяў, а сем'і здабылі надзею і шчасце.
Сучасныя дасягненні службы грунтуюцца на ўкладзе многіх пакаленняў медыцынскіх работнікаў. Іх вопыт бясцэнны, а любоў да абранай справы натхняе маладых спецыялістаў. Дарагія ветэраны, не шкадуючы сіл, не лічачы выхадныя і святы, вы прыходзілі на дапамогу дзецям, пераадольваючы цяжкасці станаўлення, вы заклалі надзейную базу для стабільнага развіцця рэгіянальнай педыятрыі, з'яўляецеся захоўнікамі яе лепшых традыцый. Моцнага здароўя вам на доўгія гады.
Сёння жыхары Віцебскай вобласці маюць шматфункцыянальны, добра аснашчаны дзіцячы клінічны цэнтр, у склад якога ўваходзіць больш за 50 лячэбных, дыягнастычных і спецыялізаваных аддзяленняў, рэабілітацыйна-аздараўленчы цэнтр «Радуга». Цэнтр з'яўляецца клінічнай базай Віцебскага медыцынскага ўніверсітэта і медыцынскага каледжа. Велізарнае дзякуй вам за працу, за ўсмешкі і смех дзяцей, якім вы дорыце сваю любоў і клопат. Жадаем вам здароўя, шчасця, аптымізму, цудоўнага настрою, цікавай і плённай працы, прафесійных поспехаў!».
Начальнік галоўнага ўпраўлення па ахове здароўя аблвыканкама Міхаіл Вішневецкі зачытаў віншавальны адрас міністра аховы здароўя Рэспублікі Беларусь Дзмітрыя Піневіча:
«Паважаныя супрацоўнікі Віцебскага абласнога дзіцячага клінічнага цэнтра! Шчыра віншую вас са стагоддзем педыятрычнай службы горада Віцебска! За гэтыя гады пройдзены ўнікальны шлях ад сціплай дзіцячай амбулаторыі і асобных дзіцячых ложкаў у розных бальніцах да сучаснай установы аховы здароўя, якая аказвае ўсе віды педыятрычнай дапамогі на самым высокім узроўні. Ваш прафесіяналізм, самаадданасць, адказнасць, адданасць абранай справе і добрыя чалавечыя якасці заслугоўваюць велізарнай удзячнасці. Вы заўсёды знаходзіцеся на перадавой барацьбы за здароўе дзяцей, спяшаецеся на дапамогу і ў цяжкія хвіліны аказваецеся побач з тымі, каму гэта жыццёва неабходна.
Асаблівая падзяка ўсім, хто ўдзельнічаў у станаўленні ўстановы, яе адраджэнні ў пасляваенныя гады, хто ўзбагачаў слаўныя традыцыі калектыву і сёння працягвае актыўна ажыццяўляць настаўніцкую дзейнасць, перадаючы маладому пакаленню свае каштоўныя веды і жыццёвы вопыт.
Упэўнены, што дзякуючы высокай кампетэнцыі, пастаяннаму імкненню да павышэння даступнасці якасці і культуры аказання медыцынскай дапамогі, вы і надалей будзеце ўносіць важкі ўклад у захаванне і ўмацаванне здароўя беларускай нацыі, прымнажэнне чалавечага капіталу нашай краіны. Жадаю ўсім невычарпальных сіл, цярпення, новых працоўных здзяйсненняў і поспехаў у імя далейшага развіцця і росквіту нашай любімай Беларусі.
Моцнага здароўя, шчасця, міру і дабра вам і вашым родным і блізкім!».
Спецыялістаў павіншавалі таксама прадстаўнікі гарадской улады, абласнога аб'яднання прафсаюзаў, Віцебскага медыцынскага ўніверсітэта і іншыя.
Ганаровыя граматы і падзякі ад Міністэрства аховы здароўя Рэспублікі Беларусь, аблвыканкама, гарвыканкама, абласнога аб'яднання прафсаюзаў і іншых арганізацый атрымалі каля 50 спецыялістаў.
Вывучаючы гісторыю стварэння педыятрычнай службы, можна прасачыць не толькі паляпшэнне якасці медыцыны, як следства – змяншэнне дзіцячай смяротнасці, але таксама змяненне стаўлення да жанчын у грамадстве, дэмаграфію і масу іншых цікавых фактаў.
Упершыню дзіцячыя стацыянары і амбулаторыі аддзяліліся ад медыцыны агульнага профілю ў 1922 годзе. З гэтага моманту педыятрыя пачала развівацца як самастойная галіна аховы здароўя Віцебскай вобласці. Усё больш стацыянары, амбулаторыі і бальніцы сталі насіць статус дзіцячых, а праз некалькі гадоў, у сувязі са звялічэннем нараджальнасці, з'явілася неабходнасць у стварэнні новай бальніцы, бо астатнія спецыялізаваныя медустановы былі перапоўнены. І толькі ў 1940 годзе ў Віцебску была пабудавана новая дзіцячая бальніца, якая знаходзілася на месцы цяперашняй бальніцы хуткай медыцынскай дапамогі і налічвала 150 ложкаў. На жаль, падчас Вялікай Айчыннай вайны будынак быў разбураны.
Пасля вызвалення Віцебска ад нямецка-фашысцкіх захопнікаў дзіцячая бальніца адкрылася ў снежні 1944 года, а будаўніцтва новай, на 180 ложкаў, было скончана ў 1966 годзе. У лютым 1976-га яна атрымала статус абласной.
Новы этап развіцця гісторыі педыятрычнай службы пачаўся 1 студзеня 2015 года шляхам зліцця абласных дзіцячай клінічнай бальніцы і дзіцячай паліклінікі з пяццю філіяламі, рэабілітацыйна-аздараўленчага цэнтра «Радуга» Лёзненскага раёна, быў створаны абласны дзіцячы клінічны цэнтр – флагман сённяшняй педыятрычнай службы Віцебшчыны.
