У Віцебску з'явіцца дзесяціметровая ўваходная арка з гербам горада
Цяпер будаўнікі рэканструююць бульвар па вуліцы Кірава. Тут кладуць новую плітку, ідзе мантаж сучаснага асвятлення. З боку чыгуначнага вакзала ўзводзяць уваходную арку: яна будзе з дэкорам і выявай ордэна Працоўнага Чырвонага Сцяга і фрагмента ўказа аб узнагароджанні ім горада. Алею ўпрыгожаць кветнікі, малыя архітэктурныя формы, а таксама скульптура, прысвечаная маладым закаханым. На бульвары ўсталююць лаўкі. "Вышыня аркі разам з гербам Віцебска па цэнтры складзе дзесяць метраў", - дадаў галоўны інжынер УКБ горада Сяргей Польскі.
Падчас фестывалю-кірмашу арганізуюць некалькі пляцовак у цэнтры горада. Асноўныя падзеі разгорнуцца на плошчах Свабоды і Перамогі, у Летнім амфітэатры і каля яго. Папярэдняя праграма свята ўключае шэсце аграрыяў ад плошчы Перамогі да Летняга амфітэатра, дзе адбудзецца цырымонія ўзнагароджання і канцэрт. На "Дажынках" таксама маюць намер правесці выставы сельскагаспадарчай тэхнікі, дасягненняў АПК, арганізуюць тэматычныя пляцоўкі, будуць працаваць падворкі раёнаў Віцебскай вобласці.
Традыцыйныя абласныя "Дажынкі" сёлета плануюць правесці 26 верасня. У Віцебску падчас падрыхтоўкі да свята ўжо ўзвялі і адкрылі некалькі важных аб'ектаў: Полацкі пуцеправод, дарогу, якая злучыла праспект Будаўнікоў з мікрараёнам Білева, абноўленую плошчу Свабоды, сярэднюю школу. Таксама ў горадзе хутка пачне працаваць футбольны манеж.