У Віцебску прыступіў да працы першы ў рэспубліцы студэнцкі IT-атрад

Яго наймальнікам стала прыватная кампанія «ТыАйТы», адным з напрамкаў дзейнасці якой – стварэнне, прасоўванне і рэдызайн сайтаў. Уласна гэтым і зоймецца атрад з сямі чалавек у рамках новага праекта «Reweb». У камандзе – праграмісты, вэб-дызайнеры, маркетынг і менеджэр, усё гэта студэнты ВДТУ, ВДУ ім. П.Машэрава і навучэнцы політэхнічнага каледжа.

– Мы бярэм на практыку будучых праграмістаў і дызайнераў, прадастаўляем ім месцы для размеркавання, і сутыкнуліся з тым, што не заўсёды выпускнікам хапае кваліфікацыі і матывацыі, навучанне недастаткова арыентавана на практыку. Праца ў атрадзе дапаможа студэнтам атрымаць веды і вопыт, каб стаць выдатнымі запатрабаванымі спецыялістамі, – адзначыў дырэктар кампаніі «ТыАйТы» Макс Волкаў. – Чаму гэта не проста спецыялісты па дагаворы падраду, а менавіта атрад? Мы актыўна супрацоўнічаем з абласным камітэтам БРСМ, дзе канцэнтруецца цікавая моладзь. Я як прадпрымальнік лічу свае грошы, а прыём на працу студэнцкага атрада прадугледжвае для наймальніка льготы па падаткаабкладанні, па ФСАН і іншыя перавагі. Акрамя таго, гэты праект для нас цікавы, так як у будучыні ў яго ёсць усе шансы стаць асобным бізнесам.

Дарэчы, сем чалавек адабралі з 50 кандыдатаў, якім трэба было прайсці невялікае тэставае заданне, каб вызначыць іх магчымасці. Затым з хлопцамі правялі навучальныя заняткі непасрэдна на базе «ТыАйТы». Узначаліў атрад студэнт тэхналагічнага ўніверсітэта Матвей Мацвееў – аўтар праекта інтэрнэт-сэрвіс Yotravels, які стаў адным з пераможцаў абласнога этапу і прадстаўляў вобласць на рэспубліканскім конкурсе «100 ідэй для Беларусі». Хлопцы прыдумалі назву праекта, распрацавалі лагатып, стварылі сайт, старонкі ў сацыяльных сетках, і літаральна за пару дзён працы з'явіліся папярэднія дамоўленасці з двума фірмамі на аказанне web-паслуг. Зарплата каманды «Reweb» будзе залежаць ад эфектыўнасці яе дзейнасці.

– Цяпер мы студэнты, але неўзабаве скончым вучобу, і трэба будзе ісці працаваць. Тут мы атрымаем неабходны вопыт і магчымасці для прасоўвання, – сказаў камандзір IT-атрада Мацвей Мацвееў.

Кампанія «ТыАйТы» на рынку камп'ютарных паслуг і праграмавання Віцебскай вобласці каля 6 гадоў, у апошні год штат вырас да 15 чалавек. Праграмісты, як правіла, працуюць дыстанцыйна, гэтак жа будзе арганізавана дзейнасць і праекта «Reweb».

– Дзякуючы нашым партнёрам удалося стварыць новы студэнцкі атрад, гэта першы падобны вопыт у рэспубліцы, – адзначыў другі сакратар абласнога камітэта БРСМ Дзмітрый Туранок. – Першы месяц працы пакажа, наколькі напрамак IT-атрадаў дзейсны і ці можа быць запатрабаваны іншымі кампаніямі.

Вольга МАСЛОЎСКАЯ, фота аўтара. «Віцебскія весці».