У Віцебску прададзена ў арэнду на сезон больш за 60 пляцовак пад аб'екты гандлю і грамадскага харчавання
Падобны аўкцыён напярэдадні летняга сезона Віцебскі гарвыканкам праводзіць пяты раз. Усяго на таргі выстаўлялася 95 лотаў па продажы права арэнды, у тым ліку 79 пляцовак пад нестацыянарны гандаль (аўтакрамы, кіёскі і аўтаматы па продажы гарачых напояў, разносны гандаль) і 16 месцаў для аб'ектаў грамадскага харчавання рознага фармату. Цікавасць да прадметаў таргоў праявілі 29 удзельнікаў (у 2019 годзе было 40 пакупнікоў), што з улікам асаблівасцей бягучай сітуацыі і знешніх неспрыяльных фактараў можна лічыць добрым вынікам, адзначылі арганізатары. Выручаныя на аўкцыёне амаль Br37 тыс. паступяць у гарадскі бюджэт.
Самая вострая барацьба разгарнулася за пляцоўкі пад размяшчэнне цянежак па продажы агародніны і садавіны. Яны размешчаны пераважна ў аддаленых раёнах горада і здаюцца ў арэнду на тэрмін па 31 кастрычніка 2020 года. У выніку пяць з сямі аб'ектаў прададзены з перавышэннем пачатковай цаны ў 100 і больш разоў. Самым дарагім лотам аўкцыёну аказалася права арэнды месца на ўскраіне абласнога цэнтра з самай вялікай арэнднай платай (20 БВ у месяц), якое пераможца выкупіў за Br5,5 тыс., што ў 163 разы больш за пачатковую цану.
Найбольш запатрабаванымі аказаліся тэрыторыі пад нестацыянарны гандаль у паркавых зонах, у раёне набярэжнай Віцьбы і ў цэнтральнай частцы абласнога цэнтра. Так, удзельнікі выкупілі ўсе сем месцаў пад гандаль попкорнам і цукровай ватай. Павышаным попытам у прадпрымальнікаў карысталіся месцы рэалізацыі сувеніраў і цацак (прададзены сем лотаў з дзевяці). Адзін удзельнік набыў права арэнды ўсіх чатырох выстаўленых на таргі пляцовак для размяшчэння кіёскаў па продажы гарачых напояў.
Упершыню на аўкцыён выстаўляліся ўчасткі пад размяшчэнне фуд-тракаў, аднак попыту на іх не было. У цэлым з 16 месцаў пад аб'екты грамадскага харчавання рознага фармату ўдзельнікі праявілі цікавасць да чатырох аб'ектаў у цэнтральнай частцы абласнога цэнтра.
У склад прадметаў аўкцыёну ўключаны ўчасткі тэрыторыі з пліткавым пакрыццём плошчай ад 5 да 100 кв.м у розных частках горада, у асноўным у месцах адпачынку і паркавых зонах. Тэрмін іх арэнды ўстаноўлены па 31 кастрычніка бягучага года, а таксама каля 15% аб'ектаў здаюцца ў часовае карыстанне на год. Месцы вызначаны па выніках праведзенага упраўленнем гандлю гарвыканкама маніторынгу з улікам шэрагу крытэрыяў, у тым ліку патрэбаў насельніцтва ў паслугах і запатрабаванасці тых ці іншых участкаў у суб'ектаў гаспадарання.
Патэнцыйныя арандатары павінны адпавядаць шэрагу ўмоў. У прыватнасці, для адкрыцця летняга кафэ патрабуецца мець стацыянарны аб'ект грамадскага харчавання ў абласным цэнтры. Рэжым працы сезонных кафэ ўстаноўлены да 23.00, пры гэтым музычнае суправаджэнне можна выкарыстоўваць да 21.00. Арандатар абавязваецца ўсталяваць па два біятуалеты каля кожнага аб'екта. Праца кафэ не павінна выклікаць скаргаў жыхароў бліжэйшых дамоў.