У Віцебску прайшла абласная педагагічная канферэнцыя
"Упершыню Віцебская вобласць заняла першае месца ў краіне па выніках рэспубліканскіх алімпіяд. Па выніках ЦТ рэгіён знаходзіцца ў тройцы лідараў. Па кожным напрамку ёсць свае дасягненні, пачынаючы ад дашкольнай адукацыі і заканчваючы навучаннем у прафесійна-тэхнічных установах, - расказаў журналістам начальнік галоўнага ўпраўлення па адукацыі аблвыканкама Дзмітрый Хома. - Працэс структурнай аптымізацыі сферы адукацыі ў вобласці практычна завершаны, але ён будзе працягвацца ўжо зусім у іншым фармаце, адрозным ад таго, што мы праводзілі ў 2018 годзе. Гэта будзе пошук унутраных рэзерваў для развіцця новых магчымасцей. На Віцебшчыне за парты сядуць больш за 12 тыс. першакласнікаў, а агульная колькасць навучэнцаў устаноў агульнай сярэдняй адукацыі складзе 116 тыс. чалавек. Усе 314 школ гатовыя да прыёму дзяцей. Таксама яшчэ працягнуцца рамонтныя работы ў некаторых установах адукацыі, напрыклад, у СШ №2 гарпасёлка Бешанковічы. Там мясцовы выпускнік пажадаў укласці сродкі ў рамонт роднай школы, толькі сёлета ён накіруе больш за Br3 млн, таму ў гэтай СШ у першай чвэрці будуць пэўныя нязручнасці. Спадзяёмся, што з пачаткам другой чвэрці дзеці прыйдуць ужо абноўленую школу".
Педагогі з усёй вобласці атрымалі шчырыя віншаванні з надыходзячым святам, Днём ведаў, ад прадстаўнікоў абласной улады і духавенства, лепшым педагогам і дзеячам адукацыйнай сферы ўручылі ганаровыя ўзнагароды. "Настаўнік - адна з асноўных прафесій, якая фарміруе грамадзян, патрыётаў. Тое, што будзе закладзена ў школе, а потым працягнецца ў сярэдніх спецыяльных і вышэйшых навучальных установах, фарміруе будучыню нашай краіны. Ад гэтага будзе залежаць, ці будзем мы квітнець, ці будзем размерана ісці ў фарватэры ўсіх іншых краін", - падкрэсліў старшыня аблвыканкама Аляксандр Субоцін, падзякаваўшы педагогам за нялёгкую і важную працу.
Ён таксама адзначыў, што менавіта настаўнік дапамагае дзіцяці паглядзець на свет шырока адкрытымі вачыма, вучыць думаць і крытычна ўспрымаць інфармацыю, якая ліецца патокам з усіх крыніц. Кіраўнік вобласці звярнуў увагу, што паняцце "патрыятызм" мае вялікае значэнне, калі яго правільна падаць дзецям. "Аднойчы я пачуў фразу, што ёсць патрыятызм, а ёсць нацыяналізм. Патрыятызм - гэта любоў да ўсяго свайго: мовы, зямлі, традыцый. Нацыяналізм - гэта нянавісць да ўсяго чужога. Я ўпэўнены, што нашы педагогі навучаць юных беларусаў адрозніваць гэтыя паняцці і быць сапраўднымі патрыётамі сваёй Радзімы", - дадаў Аляксандр Субоцін.
У даўнія часы, асабліва ў сельскай мясцовасці, самымі паважанымі людзьмі лічыліся святары і настаўнікі. Сёння праца педагога нялёгкая і, на першы погляд, непрыкметная, аднак для дзіцяці вобраз першага настаўніка часам становіцца вызначальным, уплывае на выбар жыццёвага шляху. Кіраўнік Віцебскай епархіі архіепіскап Дзімітрый, напутваючы педагогаў, зрабіў акцэнт на духоўным развіцці падрастаючага пакалення. "Духоўная навука патрабуе шмат укладанняў душэўных сіл. І тут асоба педагога важная. Людзі, якія выкладаюць дзецям, таксама павінны працаваць і над сабой", - адзначыў уладыка.
Для сабраўшыхся на канферэнцыі ў абласной філармоніі вінаватых урачыстасці творчыя калектывы вобласці далі яркі канцэрт. Харэаграфічныя і вакальныя нумары падарылі настаўнікам і выкладчыкам мноства ўражанняў і зарадзілі іх на надыходзячы навучальны год пазітывам.-0-
"БЕЛТА"