У Віцебску прайшло ўшанаванне лаўрэатаў абласной прэміі «Чалавек года Віцебшчыны»
– Злучаючы дзве знакавыя падзеі ў жыцці рэгіёна, мы яшчэ раз падкрэсліваем важнасць і заканамернасць абвяшчэння 2022-га – Годам гістарычнай памяці. Гістарычная памяць – гэта тое, што фарміруе любоў, адданасць, павагу да роднай Айчыны, гатоўнасць абараняць і берагчы сваю Радзіму, тое, што вызначае логіку сацыяльнага быцця, – падкрэсліў старшыня аблвыканкама Аляксандр Субоцін.
У урачыстасцях прынялі ўдзел прадстаўнікі выканаўчай і заканадаўчай улады рэспублікі, міністэрстваў, усіх раёнаў вобласці і іншых рэгіёнаў Беларусі, дэпутаты. Намеснік кіраўніка Адміністрацыі Прэзідэнта Беларусі Максім Ермаловіч зачытаў віншаванне Аляксандра Лукашэнкі. Свае віншаванні па відэасувязі перадаў прэм'ер-міністр Беларусі Раман Галоўчанка, які, у прыватнасці, выказаў упэўненасць, што жыхары Віцебшчыны будуць беражліва захоўваць народную памяць, слаўныя традыцыі, вернасць роднай зямлі і прымнажаць добрую славу роднага краю.
Вялікая зала КЗ «Віцебск», дзе праходзіў урачысты сход, вітаў былых кіраўнікоў вобласці: старшыню Палаты прадстаўнікоў Нацыянальнага сходу Беларусі Уладзіміра Андрэйчанку, які ўзначальваў рэгіён з 1994 па 2008 гады, і Мікалая Шарснёва, які займаў гэты пост з 2014 па 2021 гады, якім уручылі Ганаровыя дыпломы Віцебскага аблвыканкама.
У сваім выступленні на ўрачыстым сходзе Аляксандр Субоцін, зрабіўшы экскурс у гісторыю Віцебшчыны, спыніўся на памятных датах і знакавых асобах, якія праславілі родны край. Сярод іх героі Вялікай Айчыннай вайны: Мінай Шмыроў, Леў Даватара, Канстанцін Заслонаў, Аляксей Данукалаў, Вера Харужая, Зінаіда Тусналобыва-Марчанка. У вобласці шырока адзначаюць 105-годдзе нашага слаўнага земляка, Героя Савецкага Саюза, Героя Сацыялістычнай працы Пятра Машэрава.
– Жыхары вобласці заўсёды былі годнымі працаўнікамі і абаронцамі Айчыны, славілі свой край мірнымі і ратнымі справамі. І сёння рэгіён працягвае актыўна нарошчваць сацыяльна-эканамічны патэнцыял, – адзначыў Аляксандр Субоцін.
Працягваецца работа па захаванні і павышэнні канкурэнтаздольнасці традыцыйных для Прыдзвінскага краю галін, такіх як лёгкая і харчовая прамысловасць, нафтахімія, дрэваапрацоўка. Па выніках мінулага года Віцебская вобласць заняла першае месца ў рэспубліцы па экспарце тавараў, рознічным і аптовым тавараабароце, другое – па валавым рэгіянальным прадукце і экспарце паслуг.
Сёння вобласць падтрымлівае знешнегандлёвыя адносіны са 107 дзяржавамі свету. У 2022 годзе адкрыты новыя рынкі, арганізаваны пастаўкі прадукцыі з віцебскай маркай у Дамініканскую Рэспубліку, Зімбабвэ, Ірак, Туніс, Эфіопію. У краіны далёкай дугі экспарт павялічыўся ў 12 (!) разоў, а гэта амаль 54% экспарту вобласці. За гэтым, як падкрэсліў кіраўнік вобласці, стаіць напружаная праца, якую вялі органы мясцовай улады, дырэктарскі корпус, спецыялісты-прафесіяналы.
– Найважнейшым драйверам эканамічнага росту ў бліжэйшыя гады стануць інвестыцыі ў асноўны капітал. У 2023-м аб'ём інвестыцый павінен скласці 3,5 мільярда рублёў, што ў 1,4 раза больш за мінулагодні. Запланавана рэалізацыя больш за 400 праектаў, і ні адзін з іх не здымаецца з рахункаў, нягледзячы на санкцыйны фактар, – заўважыў Аляксандр Субоцін.
Сёлета спіс лаўрэатаў прэміі «Чалавек года Віцебшчыны», якая прысуджаецца з 2010 года, папоўнілі 50 прадстаўнікоў розных прафесій, усіх сфер народнай гаспадаркі і галін. Гэта кіраўнікі прадпрыемстваў, рабочыя, жывёлаводы, трактарысты, настаўнікі, прадстаўнікі творчай інтэлігенцыі і сілавых ведамстваў і г.д.
– Вас адрозніваюць уменне працаваць на вынік, мысліць наватарску, патрыятызм і мэтанакіраванасць. Прафесіяналы сваёй справы – залаты фонд краю, – звярнуўся да лаўрэатаў Аляксандр Субоцін, дадаўшы, што летапіс Віцебшчыны працягваецца ўжо ў 2023 годзе, абвешчаным у краіне Годам міру і стварэння.
У рамках мерапрыемства была арганізавана выстава-прэзентацыя галін народнай гаспадаркі і культурнай спадчыны Віцебскай вобласці. На ёй былі прадстаўлены ўзоры прадукцыі прадпрыемстваў і арганізацый паўночнага рэгіёна. На адной з пляцовак можна было азнаёміцца з творчасцю народных майстроў, работы якіх увайшлі ў спіс нематэрыяльнай культурнай спадчыны Беларусі.
Завяршыліся ўрачыстасці святочным канцэртам лепшых калектываў Віцебшчыны.